Дэлхийн 12 улсад салбартай “DHH Law Firm” Монгол Улсад салбараа нээлээ
БНХАУ-ын шилдэг арван хуулийн фирмийн нэг болох “DHH Law Firm” олон улсын хуулийн фирмийн Монгол Улс дахь салбар компани болох “DHH Law Mongolia” ХХК албан ёсны нээлтээ хийлээ.
Нээлтийн үйл ажиллагаанд МҮХАҮТ-ын Ерөнхий нарийн бичгийн дарга С.Баясгалан, “DHH Law Mongolia” ХХК-ийн төлөөлөн удирдах зөвлөлийн дарга, хууль зүйн ухааны доктор, профессор Б.Батзориг, Бээжин дэхь “DHH Law Firm”-ийн Ерөнхийлөгч, доктор Лиу Көжиан, Монголын хуульчдын холбооны Ерөнхийлөгч П.Одгэрэл, БНХАУ-аас Монгол Улсад хөрөнгө оруулагчдын Зунхау нийгэмлэгийн төлөөлөн удирдах зөвлөлийн дарга Сай И Бу, Нийслэлийн өмгөөлөгчдийн зөвлөлийн дарга Т.Энхбаяр, “Нэг бүс-Нэг зам” Олон улсын хөгжлийн судалгааны академийн бодлого зохицуулалтын судалгааны хэлтсийн дарга Лиу-Чан нарын хүмүүс оролцлоо.
Бээжин дэхь “DHH Law Firm”-ийн Ерөнхийлөгч, доктор Лиу Көжиан энэ үеэр хуулийн фирм нь Монгол Улсад салбараа нээж, үйл ажиллагаа явуулах болсонд баярлаж буйгаа онцлоод дэлхий дахинд 12 салбартай томоохон компани гэдгээ дуулгасан юм. “DHH law Mongolia” олон улсын хуулийн компани нь иргэд, бизнес эрхлэгч, аж ахуй нэгж байгууллага болон хөрөнгө оруулагч нарын эрх, хууль ёсны ашиг сонирхлыг хамгаалах хууль зүйн менежментийн цогц зөвлөх үйлчилгээ үзүүлдэг. Тус компани нь “DHH Law Firm”-ийн гадаад улс дахь 12 салбар, БНХАУ-ын бүх хот, бүс нутаг дахь салбаруудтай хамтран ажилладаг. Салбартаа 25 жил хүртэл ажилласан хуульч, өмгөөлөгчид, 40 жил хүртэл салбартаа ажилласан зөвлөх, эрдэмтэн, мэргэжилтэн бүхий мэргэшсэн чадварлаг хамт олон бүрджээ.
Нээлтийн үеэр МҮХАҮТ-ын Ерөнхий нарийн бичгийн дарга С.Баясгалан үг хэлэхдээ “Монгол, БНХАУ дипломат харилцаа тогтоосны 75 жилийн ойн хүрээнд хоёр улс бизнесийн эрхзүйн орчны хувьд хамтын ажиллагааг өргөжүүлж байгаа арга хэмжээний гэрч болж байна. Цаашид хоёр улсын гадаад худалдааны эргэлтийг 20 тэрбум ам.долларт хүргэх зорилтыг Засгийн газраас тавьж, нэн ялангуяа гадаад худалдааг төрөлжүүлэх, зөвхөн уул уурхайгаас хамааралтай байдлыг багасгах зорилтыг бүх түвшиндээ тавьж ажиллаж байна. Хоёр улсын эрхзүйн орчныг харилцан судлах, бие биетэйгээ хамтран ажиллах, бизнесүүдэд тулгарч байгаа асуудлуудыг шийдвэрлэхэд мэргэжлийн байгууллагуудын үүрэг оролцоо улам бүр нэмэгдэх хандлагатай болж байна. “DHH Law Mongolia” ХХК-ийн хувьд зөвхөн бизнесүүдийн эрхзүйн орчинд тулгарч байгаа асуудлыг шийдвэрлэхээс гадна Монгол Улсад дэлхийн 12 улсад салбартай мэргэжлийн эрхзүйн байгууллагын салбарыг байгуулж байгаа гэдгээрээ хуульчдын, бизнесийн эрхзүйн орчны хүрээнд шинэ технологи, ноу-хауг авч ирж байгаа дэвшил болсон гэж МҮХАҮТ-ын зүгээс харж байна. “DHH Law Mongolia” ХХК МҮХАҮТ-д гишүүнээр элссэн. МҮХАҮТ олон нийтэд үйлчлэх статустай байгууллагын хувьд Монгол Улсын бизнесийн бүх орчинд ажиллаж байгаа аж ахуй нэгж, Монгол Улсад үйл ажиллагаа явуулж байгаа бүх хөрөнгө оруулагчдыг мэдээ мэдээллээр хангах, дэмжих, туслах үйлчилгээ үзүүлдэг. Тиймээс цаашид танай компанитай өргөн хүрээнд хамтарч ажиллана гэдгээ илэрхийлж байна” гэлээ.
“DHH Law Mongolia” ХХК-ийн хувьд бизнесийн тодорхой салбарынханд хууль зүйн цогц үйлчилгээ үзүүлэх бизнес төвүүд, зөвлөхүүд, партнер хуулийн фирмүүдтэй хамтран ажилладаг бөгөөд Монгол Улсад түр болон байнга оршин суух БНХАУ-ын иргэд, бизнес эрхлэгч иргэн, аж ахуй нэгж байгууллага болон хөрөнгө оруулагч нарын эрх, хууль ёсны ашиг сонирхлыг хамгаалах хууль зүйн менежментийн цогц зөвлөх үйлчилгээг Монгол Улсын болон олон улсын стандартад нийцүүлэн үзүүлэх юм байна. Энэхүү нээлтийн ёслолтын дараа “Монгол Улсын бизнес эрхлэгчид БНХАУ-д, БНХАУ-ын бизнес эрхлэгчид Монгол Улсад хөрөнгө оруулах орчин” сэдэвт хэлэлцүүлэг “Чингис хаан” зочид буудлын хурлын танхимд боллоо.
