Монгол Улсад үйл ажиллагаа явуулж буй төр, хувийн хэвшлийн лабораториудын чадавхыг бэхжүүлэх, шинжилгээний үр дүнгийн найдвартай байдлыг хангах, олон улсын түвшинд хүргэх шаардлага нэмэгдэж байна.

Энэ хүрээнд МҮХАҮТ-ын дэргэдэх Бизнес академиас зохион байгуулдаг “ISO/IEC 17025:2017 – Лабораторийн менежментийн тогтолцоо” сэдэвт анхан шатны сургалтыг энэ сарын 22, 23-ны өдрүүдэд тав дахь удаагаа амжилттай зохион байгууллаа.

Энэ удаагийн сургалтад нийт 10 мэргэжилтэн хамрагдаж, хоёр өдрийн турш лабораторийн менежментийн тогтолцоо, ISO/IEC 17025:2017 стандартын шаардлага болон хэрэгжилтийн талаар онол, практик хосолсон арга зүйгээр мэдлэг, ур чадвараа дээшлүүллээ.

Сургалтыг салбарын туршлагатай сургагч багш Х.Жаргал, Ц.Шүр, Д.Эрдэнэтуяа, Б.Болортуяа нар удирдан явуулсан бөгөөд оролцогчдод стандартын шаардлагыг практикт хэрэгжүүлэхэд чиглэсэн мэдлэг, мэдээллийг өгсөн юм.

Мөн сургалтын гурав дахь өдөр ХХААХҮСХТ-ийн Арьс ширний төв лабораторийн үйл ажиллагаатай газар дээр нь танилцах, туршлага судлах аялал зохион байгуулж, лабораторийн өдөр тутмын үйл ажиллагаа, шинжилгээний аргачлал болон стандартын хэрэгжилтийн талаар бодит орчинд танилцлаа.

Тус сургалт нь лабораториудын менежментийн тогтолцоог сайжруулах, шинжилгээний үр дүнгийн найдвартай байдлыг нэмэгдүүлэх, олон улсын стандартын шаардлагыг хангах мэргэжлийн чадавхыг бэхжүүлэхэд чиглэж байна.