БНХАУ-ЫН ЛЯОНИНЬ МУЖИЙН ОЛОН УЛСЫН ХӨРӨНГӨ ОРУУЛАЛТ, ХУДАЛДААНЫ VII ЧУУЛГАНД МОНГОЛ УЛС ЗОЧИН ОРНООР ОРОЛЦЛОО
БНХАУ-ын Шэньян хотноо 2026 оны 9 дүгээр сарын 21–24-ний өдрүүдэд зохион байгуулагдсан Ляонинь мужийн Олон улсын хөрөнгө оруулалт, худалдааны VII чуулганд Монгол Улс зочин орноор оролцлоо.
Монгол Улсын Эдийн засаг, хөгжлийн дэд сайд С.Даваасүрэн тэргүүтэй төлөөлөгчдийн бүрэлдэхүүнд Монголын Үндэсний Худалдаа Аж Үйлдвэрийн Танхимын Ерөнхийлөгч Б.Лхагважав, Гүйцэтгэх захирал Ц.Магнайбаатар болон төрийн байгууллага, хувийн хэвшлийн төлөөлөл оролцов.
Энэ удаагийн арга хэмжээ нь Монгол Улс, Ляонинь муж хоорондын худалдаа, хөрөнгө оруулалтын хамтын ажиллагааг өргөжүүлэхийн зэрэгцээ Монголын бизнес, хөрөнгө оруулалтын боломжийг БНХАУ-ын Зүүн Хойд бүс нутаг болон олон улсын бизнесийн хүрээнд танилцуулах чухал талбар боллоо.
9 дүгээр сарын 21-ний өдөр Монголын төлөөлөгчдийг Ляонинь мужийн Намын хорооны дарга Шюй Күньлинь, мужийн захирагч Ван Синьвэй нар хүлээн авч уулзан, хоёр талын худалдаа, эдийн засгийн хамтын ажиллагаа болон цаашдын хамтын ажиллагааны боломжийн талаар санал солилцов.
Уулзалтын үеэр Монгол Улсыг Ляонинь мужийн Олон улсын хөрөнгө оруулалт, худалдааны VII чуулганд гол зочин улсаар урьж оролцуулж буйд талархал илэрхийлж, орон нутаг хоорондын харилцааг эдийн засгийн бодит хамтын ажиллагаагаар өргөжүүлэхийн чухлыг онцоллоо.
Мөн Ляонинь мужийн аж үйлдвэрийн суурь, үйлдвэрлэлийн чадавх, технологийн шийдэл, тээвэр логистикийн боломжийг Монгол Улсын дэд бүтэц, боловсруулах үйлдвэрлэл, шинэ эрчим хүч болон бусад салбарын хөгжлийн хэрэгцээтэй уялдуулах боломжийн талаар санал солилцов.
“Монгол Улс ба Ляонинийн худалдаа, эдийн засгийн хамтын ажиллагаа” сэдэвт танилцуулах хурал /2026.09.22/ зохион байгуулагдав. Тус хурлыг Монгол Улсаас БНХАУ-д суугаа Элчин сайдын яам, Ляонинь мужийн Худалдааны танхим болон МҮХАҮТ хамтран зохион байгуулж, Монгол Улсын эдийн засаг, хөрөнгө оруулалт, аялал жуулчлал, бизнесийн орчныг Ляонинь мужийн төр, бизнесийн байгууллагуудад танилцууллаа.
Хурлын үеэр Монгол Улсын эдийн засгийн хөгжлийн төлөв, бизнесийн орчин, аялал жуулчлалын салбарын боломжийг танилцуулж, Ляонинь мужийн төрийн байгууллага, аж ахуйн нэгжүүдийн төлөөлөл өөрсдийн салбарын мэдээллийг хуваалцав. Энэ үеэр МҮХАҮТ-ын Гүйцэтгэх захирал Ц.Магнайбаатар “Монгол Улсын бизнесийн орчин” сэдвээр илтгэл тавьж, Монголын эдийн засаг, бизнесийн орчин, хувийн хэвшлийн боломж болон хоёр талын худалдаа, хөрөнгө оруулалтын хамтын ажиллагааг өргөжүүлэх чиглэлээр танилцуулга хийлээ.
Шэньян хотын Шинэ Дэлхий экспо төвд Ляонинь мужийн Олон улсын хөрөнгө оруулалт, худалдааны VII чуулганы нээлтийн ёслол болж, /2026.09.23/ 50 гаруй улс, бүс нутгаас 3000 орчим зочин, төлөөлөгч оролцов.
Монгол Улсын төлөөлөгчид нээлтийн ёслолын өмнө үзэсгэлэнгийн талбайтай танилцаж, Монголын үзэсгэлэнгийн хэсэгт дэлгэгдсэн бараа бүтээгдэхүүн, үйлчилгээг сурталчлан, Монголын эдийн засаг, бизнесийн боломжийг олон улсын зочдод танилцууллаа. Тус үзэсгэлэнд МҮХАҮТ-ын Ноос, ноолуурын зөвлөлийн гишүүн байгууллагуудын төлөөлөл бүтээгдэхүүнээ дэлгэн оролцож байна. Чуулганы хүрээнд “Хятад руу экспортлох – Ляонинь олон улсын хөрөнгө оруулалт, худалдааны чуулган” сэдэвт бизнес уулзалт зохион байгуулагдаж, МҮХАҮТ-ын Гүйцэтгэх захирал Ц.Магнайбаатар оролцон, Монголын бизнесийн салбарын байр суурийг илэрхийлж үг хэлэв.
Тус уулзалт нь Монголын аж ахуйн нэгжүүдийг Хятадын зах зээл, тэр дундаа Ляонинь болон Зүүн Хойд Хятадын бүс нутгийн бизнесийн байгууллага, компаниудтай холбох, экспортын боломжийг нэмэгдүүлэх, хоёр талын худалдааны харилцааг өргөжүүлэхэд чиглэсэн юм. Мөн сэргээгдэх эрчим хүч, эрчим хүч хадгалах технологи, үйлдвэрлэлийн шинэ технологийн чиглэлээр Ляонинь мужийн аж ахуйн нэгжүүдтэй хамтран ажиллах боломжийг судлах нь хоёр талын эдийн засгийн хамтын ажиллагааг шинэ салбараар өргөжүүлэх боломжтойг талууд онцоллоо.
Монголын төлөөлөгчид Ляонинь мужийн автомашины үйлдвэрлэлийн салбарын Жинбэй болон Жили автомашины үйлдвэрүүдийн үйл ажиллагаатай танилцаж, үйлдвэрлэлийн үйл явц, технологийн шийдэл болон салбарын хөгжлийн талаар мэдээлэл авлаа. Энэхүү уулзалт, танилцах хөтөлбөр нь Монгол Улс, Ляонинь мужийн үйлдвэрлэлийн салбарын хамтын ажиллагааг худалдаанаас гадна технологи, үйлдвэрлэл, нийлүүлэлтийн сүлжээний түвшинд өргөжүүлэх боломжийг судлахад чиглэв.
Энэ удаагийн Ляонинь мужийн Олон улсын хөрөнгө оруулалт, худалдааны VII чуулган дахь Монголын төлөөлөгчдийн оролцоо нь төрийн өндөр түвшний уулзалт, эдийн засаг, хөрөнгө оруулалтын танилцуулга, олон улсын үзэсгэлэн, бизнес уулзалт, аж ахуйн нэгжүүдийн үйл ажиллагаатай танилцах зэрэг олон талт арга хэмжээг хамарлаа.
Талууд худалдаа, хөдөө аж ахуй, уул уурхай, шинэ эрчим хүч, дэд бүтэц, боловсруулах үйлдвэрлэл, тээвэр логистик, аялал жуулчлал, шинжлэх ухаан, технологийн салбарт хамтын ажиллагааг өргөжүүлэх боломжийн талаар санал солилцов.
Ляонинь мужийн аж үйлдвэрийн суурь, үйлдвэрлэлийн чадавх, технологийн шийдэл болон Зүүн Хойд Азийг холбосон худалдаа, тээвэр логистикийн байрлал нь Монгол Улсын эдийн засгийн хөгжлийн зорилттой уялдах боломжтой бөгөөд энэ хүрээнд хоёр талын аж ахуйн нэгжүүдийн шууд харилцааг өргөжүүлэх шаардлагатайг онцоллоо.
МҮХАҮТ-ын хувьд энэхүү арга хэмжээ нь Монголын аж ахуйн нэгжүүдийг Ляонинь мужийн бизнесийн байгууллага, компаниудтай холбох, экспортын боломжийг нэмэгдүүлэх, хөрөнгө оруулалт татах, шинэ технологи нэвтрүүлэх, хамтарсан төсөл хэрэгжүүлэх чиглэлээр хамтын ажиллагааны суурийг бэхжүүлэх боломжийг бүрдүүллээ.
Цаашид МҮХАҮТ нь Ляонинь мужийн Худалдааны газар болон бизнесийн байгууллагуудтай хамтын ажиллагаагаа өргөжүүлж, хоёр талын аж ахуйн нэгжүүдийн шууд харилцаа, бизнес уулзалт, худалдаа, хөрөнгө оруулалтын бодит төслүүдийг дэмжин ажиллана.
