МОНГОЛ, МОНТЕНЕГРО УЛС ХУДАЛДАА, ХӨРӨНГӨ ОРУУЛАЛТ, БИЗНЕСИЙН ХАМТЫН АЖИЛЛАГААГ ӨРГӨЖҮҮЛЭХ БОЛОМЖИЙГ ХЭЛЭЛЦЛЭЭ
Монгол Улсын Ерөнхийлөгч Ухнаагийн Хүрэлсүхийн урилгаар Монгол Улсад төрийн айлчлал хийж буй Монтенегро Улсын Ерөнхийлөгч Яков Милатовичийн айлчлалын хүрээнд Монгол-Монтенегрогийн дугуй ширээний бизнес уулзалт /2026.09.08/ Гадаад харилцааны яамны Зөвшилцөл танхимд боллоо.
Энэхүү арга хэмжээг Монголын Үндэсний Худалдаа Аж Үйлдвэрийн Танхим (МҮХАҮТ) зохион байгуулж, хоёр улсын төр, бизнесийн төлөөлөл эдийн засаг, хөрөнгө оруулалтын орчин болон хамтын ажиллагааны шинэ боломдуудын талаар санал солилцов.
Уулзалтыг Монтенегро Улсын Ерөнхийлөгч Яков Милатович, Монгол Улсын Тэргүүн шадар сайд бөгөөд Эдийн засаг, хөгжлийн сайд Ж.Энхбаяр, МҮХАҮТ-ын Ерөнхийлөгч Б.Лхагважав нар нээж үг хэллээ.
МҮХАҮТ-ын Ерөнхийлөгч Б.Лхагважав Монгол, Монтенегро улс газарзүйн хувьд алслагдсан хэдий ч худалдаа, хөрөнгө оруулалт, бизнесийн хамтын ажиллагааг өргөжүүлэх бодит боломж олон байгааг онцлов. Тэрбээр Монгол Улсын уул уурхай, мал аж ахуй, ноолуур, хүнс, хөдөө аж ахуй, аялал жуулчлалын салбарын боломжийг Монтенегрогийн аялал жуулчлал, үйлчилгээ, дэд бүтэц, хөрөнгө оруулалтын орчин болон Европын зах зээлтэй холбогдох боломжтой уялдуулах нь хамтын ажиллагааны чухал чиглэл болохыг тэмдэглэв. Мөн Монтенегро Улсын бизнесийн орчин, хөдөлмөр эрхлэлтийг дэмжих бодлогын шинэчлэл, тэр дундаа "Europe Now 2" хөтөлбөрийн туршлагаас суралцах боломжийг онцолсон юм.
Уулзалтын үеэр Монтенегро Улсын Эдийн засгийн танхимын Дэд ерөнхийлөгч Никола Вуйович тус улсын эдийн засаг, хөрөнгө оруулалтын орчныг танилцуулсан бол МҮХАҮТ-ын Ерөнхий нарийн бичгийн дарга Б.Саруул Монголын бизнес, хөрөнгө оруулалтын орчны талаар мэдээлэл өглөө.
Мөн хоёр улсын эдийн засаг, хөрөнгө оруулалтын орчныг танилцуулсан видео мэдээллийг хүргэж, оролцогчид асуулт, хариултын хэлбэрээр санал солилцон, цаашид бизнесийн түншлэлийн боломжуудыг хэлэлцэв.
МҮХАҮТ-ын зүгээс энэхүү уулзалт нь хоёр улсын бизнес эрхлэгчдийг холбох, харилцан туршлага солилцох, шинэ худалдаа, хөрөнгө оруулалт, бизнесийн түншлэлийн суурийг бүрдүүлэх чухал алхам болсныг онцолж байна.
