МҮХАҮТ-ын Ерөнхий нарийн бичгийн дарга Б.Саруул Их Британи, Умард Ирландын Нэгдсэн Вант Улсад суугаа Монгол Улсын Онц бөгөөд Бүрэн эрхт Элчин сайд Н.Мөнхжинтэй уулзаж, хоёр орны бизнес, худалдаа, хөрөнгө оруулалтын харилцааг өргөжүүлэх талаар санал солилцлоо. Уулзалтын үеэр хоёр орны Худалдаа, аж үйлдвэрийн танхимуудын хамтын ажиллагааг идэвхжүүлэх, бизнесийн байгууллагуудын харилцаа холбоог өргөжүүлэх, туршлага солилцох, хамтарсан бизнес форум, бизнес уулзалт зохион байгуулах боломжийн талаар ярилцав. Мөн Монголын хувийн хэвшлийн компаниудыг Их Британийн зах зээлтэй холбох, хоёр улсын бизнес эрхлэгчдийн шууд харилцааг нэмэгдүүлэхэд анхаарах нь зүйтэйг онцоллоо.

Түүнчлэн Их Британийн хөрөнгө оруулагчдад Монгол Улсын эдийн засаг, хөрөнгө оруулалтын боломжийг таниулах, уул уурхай, эрчим хүч, дэд бүтэц, санхүү, ногоон шилжилт, цахим эдийн засаг зэрэг салбарт хамтын ажиллагааг өргөжүүлэх асуудлаар санал солилцов. Энэ хүрээнд МҮХАҮТ-аас Монгол Улсад хөрөнгө оруулах сонирхолтой Их Британийн бизнес эрхлэгч, хөрөнгө оруулагчдыг Монголын аж ахуйн нэгжүүдтэй холбон ажиллах, шаардлагатай мэдээлэл болон бизнесийн түншлэлийн дэмжлэг үзүүлэх боломжтойг тэмдэглэв.

Уулзалтын төгсгөлд хоёр орны бизнесийн харилцааг худалдаагаар хязгаарлахгүйгээр хөрөнгө оруулалт, технологи, мэдлэг, бизнесийн түншлэлийн чиглэлээр өргөжүүлэх нь чухлыг онцолж, МҮХАҮТ, Монгол Улсаас Их Британид суугаа Дипломат төлөөлөгчийн газар болон Их Британийн бизнесийн байгууллагуудын хамтын ажиллагааг идэвхжүүлэхээр санал нэгдэв. Цаашид Монголын бизнесийн орчны боломжийг Их Британийн бизнесийн хүрээнд илүү үр дүнтэй таниулах, бодит хөрөнгө оруулалт, хамтын ажиллагааг нэмэгдүүлэхэд чиглэсэн арга хэмжээг хамтран хэрэгжүүлэхээр тохиролцлоо. Уулзалтад МҮХАҮТ-ын Их Британи дахь төлөөлөгч Ч.Чинзоригт оролцов.