АЯЛАЛ ЖУУЛЧЛАЛЫН САЛБАР ДАХЬ МОНГОЛ, ОРОС, ХЯТАДЫН ХАМТЫН АЖИЛЛАГААНЫ ТАЛААР ХЭЛЭЛЦЛЭЭ
Монгол, Орос, Хятадын Худалдаа, аж үйлдвэрийн танхимуудын Худалдаа, эдийн засгийн 19 дэх удаагийн нэгдсэн чуулганы хүрээнд “Аялал жуулчлалын салбар дахь гурван улсын хамтын ажиллагаа” сэдэвт панел хэлэлцүүлэг амжилттай зохион байгуулагдлаа.
Хэлэлцүүлгийн үеэр МҮХАҮТ-ын дэргэдэх Аялал жуулчлалын зөвлөлийн дарга Б.Барсболд Монголын аялал жуулчлалын боломж, гурван улсын хамтын ажиллагааны талаар илтгэл мэдээлэл хийсэн бөгөөд Монгол Улсын Соёл, спорт, аялал жуулчлал, залуучуудын яамны Аялал жуулчлалын бодлого зохицуулалтын газрын дарга В.Батчимэг, Аялал жуулчлалын мэргэжлийн холбооны дэд ерөнхийлөгч В.Батзориг, Бүгд Найрамдах Буриад Улсын ХАҮТ-ын Зөвлөлийн дарга Ертанов Петр, БНХАУ-ын ӨМӨЗОрны Хөлөнбуйр хотын Худалдааг дэмжих хорооны дарга Гао Тай Чөн, БНХАУ-ын хөрөнгө оруулалттай “Хөх Сүлд” ХХК-ийн ерөнхий захирал Ван Шү Гэн нар панелистаар оролцов.
Энэ үеэр талууд гурван улсын аялал жуулчлалын хамтын ажиллагааг өргөжүүлэх боломж, хил орчмын аялал жуулчлалыг хөгжүүлэх, гурван улсыг холбосон аяллын шинэ маршрут, бүтээгдэхүүн бий болгох, тээврийн асуудлыг шийдвэрлэх, жуулчдын урсгалыг нэмэгдүүлэх талаар санал солилцлоо.
Мөн хувийн хэвшлийн хамтын ажиллагааг эрчимжүүлж, аяллын бүтээгдэхүүн, үйлчилгээг харилцан сурталчлах, бүс нутгийн онцлог, түүх, соёл, байгальд түшиглэсэн хамтарсан аяллын бүтээгдэхүүн хөгжүүлэх, групп аяллын визийг хөнгөвчлөх боломжийн талаар байр сууриа илэрхийлсэн юм. Уулзалтын төгсгөлд ойрын хугацаанд гурван улсын төр, хувийн хэвшлийн хамтарсан ажлын хэсэг байгуулж, тур оператор компаниудын уулзалтыг зохион байгуулж хамтран ажиллахаар тогтов.
