ЭДИЙН ЗАСГИЙН КОРИДОР, БООМТ, ТЭЭВЭР, ЛОЖИСТИКИЙН САЛБАР ДАХЬ ХАМТЫН АЖИЛЛАГААНЫ БОЛОМЖИЙГ ХЭЛЭЛЦЛЭЭ
Монголын Үндэсний Худалдаа, Аж Үйлдвэрийн Танхимын дэргэдэх Эдийн засгийн коридор, боомт, тээвэр, ложистикийн зөвлөл болон CAREC-ийн Олон улсын логистик, худалдааны холбоодын холбоо (CFILCA)-ны төлөөлөгчдийн хамтарсан бизнес уулзалт өнөөдөр зохион байгуулагдлаа.
Уулзалтаар эдийн засгийн коридор, боомт, тээвэр, ложистикийн салбарын хамтын ажиллагааны бодлого, боломж, бүс нутгийн тээвэр, худалдааны холболтыг хөгжүүлэх чиглэлээр мэдээлэл, санал солилцов. Мөн хоёр талын тээвэр, ложистикийн салбарт үйл ажиллагаа явуулж буй тэргүүлэгч аж ахуйн нэгжүүдийн төлөөлөл оролцож, цаашдын хамтын ажиллагаа, бизнесийн түншлэлийг өргөжүүлэх боломжийн талаар хэлэлцлээ.
Уулзалтын үеэр МҮХАҮТ-ын дэргэдэх Эдийн засгийн коридор, боомт, тээвэр, ложистикийн зөвлөлийн дарга Н.Энхнасан болон CAREC-ийн Олон улсын логистик, худалдааны холбоодын холбооны тэргүүн Lin Zhong нар хоёр улсын тээвэр, ложистикийн компаниудын үйл
ажиллагааг дэмжих, харилцан мэдээлэл солилцох, сургалт болон бизнесийн арга хэмжээг хамтран зохион байгуулах чиглэлээр Хамтын ажиллагааны санамж бичиг байгууллаа.
Энэхүү хамтын ажиллагаа нь Монгол Улсын тээвэр, ложистикийн салбарын олон улсын хамтын ажиллагааг өргөжүүлэх, бүс нутгийн тээврийн коридорын хөгжлийг дэмжих, боомтын үр ашиг, тээврийн холболтыг сайжруулах, бизнесийн шинэ түншлэл бий болгоход ач холбогдолтой юм.
Цаашид талууд эдийн засгийн коридор, боомт, тээвэр, ложистикийн салбарын бизнесийн хамтын ажиллагааг эрчимжүүлж, харилцан ашигтай төсөл, санаачилгыг хэрэгжүүлэхэд анхаарч ажиллахаар боллоо.
