“УЛААНБААТАР ТҮНШЛЭЛ-2026” ОЛОН УЛСЫН ҮЗЭСГЭЛЭН НЭЭЛТЭЭ ХИЙЖ, 108 АЖ АХУЙН НЭГЖ ШИНЭ БҮТЭЭГДЭХҮҮН, ТЕХНОЛОГИО ТАНИЛЦУУЛЖ БАЙНА
Хүнсний салбарын үйлдвэрлэгч, импортлогчид болон гадаадын аж ахуйн нэгжүүдийг нэг дор цуглуулсан “Улаанбаатар Түншлэл-2026” хүнсний салбарын олон улсын үзэсгэлэн өнөөдөр “Мишээл Экспо” олон улсын үзэсгэлэнгийн төвд нээлтээ хийлээ.
Үзэсгэлэнгийн нээлтэд Монгол Улс, ОХУ, БНХАУ-ын Худалдаа, аж үйлдвэрийн танхимуудын төлөөлөл оролцож, үг хэлэн, хүнсний салбарын худалдаа, үйлдвэрлэл, бизнесийн хамтын ажиллагааг өргөжүүлэх, аж ахуйн нэгжүүдийн харилцаа, түншлэлийг шинэ түвшинд хүргэхийн ач холбогдлыг онцоллоо. Мөн гурван улсын бизнес эрхлэгчдэд бүтээгдэхүүн, технологио танилцуулах, шинэ харилцагч, хамтын ажиллагааны боломжийг эрэлхийлэхэд олон улсын үзэсгэлэн чухал талбар болж байгааг тэмдэглэв.
Монголын Үндэсний Худалдаа Аж Үйлдвэрийн Танхимаас олон жилийн турш уламжлал болгон зохион байгуулж ирсэн “Улаанбаатар Түншлэл” үзэсгэлэн энэ жил анх удаа хүнсний салбарыг онцлон, олон улсын оролцоотойгоор зохион байгуулагдаж буйгаараа онцлог юм. Үзэсгэлэнгээр хүнсний үйлдвэрлэлийн шинэ бүтээгдэхүүн, технологи, тоног төхөөрөмж, үйлдвэрлэлийн шийдлүүдийг танилцуулахын зэрэгцээ дотоод, гадаадын аж ахуйн нэгжүүдийн хамтын ажиллагаа, бизнесийн харилцааг өргөжүүлэх боломжийг бүрдүүлж байна.
Үзэсгэлэнг Монголын Үндэсний Худалдаа Аж Үйлдвэрийн Танхим, Хүнс, хөдөө аж ахуй, хөнгөн үйлдвэрийн яам, Нийслэлийн Бизнес, инновацын газар хамтран зохион байгуулж байна.
Энэ жилийн үзэсгэлэнд Монголын үндэсний үйлдвэрлэгч, импортлогчдоос гадна БНХАУ, Бүгд Найрамдах Беларусь Улс, ОХУ, Япон, БНСУ, Казахстан, Киргизстан зэрэг улсын нийт 108 аж ахуйн нэгж оролцож, хүнсний бүтээгдэхүүн, үйлдвэрлэлийн тоног төхөөрөмж, технологи, шинэ шийдлүүдээ танилцуулан Тухайлбал, БНХАУ-аас мах, махан болон сүүн бүтээгдэхүүн боловсруулах тоног төхөөрөмж, судалгаа, хөгжүүлэлтийн чиглэлээр үйл ажиллагаа явуулдаг компаниуд оролцож байна. Харин Бүгд Найрамдах Беларусь Улсаас амттан, чихэр, жигнэмэг, сүүн бүтээгдэхүүн, төрөл бүрийн шингэн хүнс, кондитерийн бүтээгдэхүүн үйлдвэрлэгч томоохон үйлдвэрүүд бүтээгдэхүүнээ танилцуулж байгаа бол ОХУ-аас агро-аж үйлдвэрийн салбарын үр тарианы томоохон нийлүүлэгч оролцож байна.
Мөн Япон Улсаас дэлхийд танигдсан матча цай болон өндөр чанартай гал тогооны хэрэгслийг танилцуулж байгаа бол БНСУ болон бусад оролцогч орнуудаас хүнсний бүтээгдэхүүн, үйлдвэрлэлийн тоног төхөөрөмж, технологийн шинэ шийдлүүдийг дэлгэн үзүүлж байна.
Үүний зэрэгцээ Монголын хүнсний үйлдвэрлэгч, импортлогчид өөрсдийн шинэ болон онцлох бүтээгдэхүүнээ хэрэглэгчид, бизнесийн төлөөлөлд танилцуулж, бүтээгдэхүүн, үйлчилгээгээ сурталчлах, шинэ харилцагч, бизнесийн түнштэй болох боломжийг бүрдүүлж байна. Үзэсгэлэнгийн өдрүүдэд оролцогч компаниуд шинэ бүтээгдэхүүний нээлт, бүтээгдэхүүний амталгаа, урамшуулалт худалдаа, сугалаа болон бусад танилцуулга, сурталчилгааны арга хэмжээ зохион байгуулна.
“Улаанбаатар Түншлэл-2026” хүнсний салбарын олон улсын үзэсгэлэн 9 дүгээр сарын 17–20-ны өдрүүдэд өдөр бүр 10:00–18:00 цагт Мишээл эксо төвд ажиллана.
Үзэсгэлэнгийн ерөнхий ивээн тэтгэгч: ТЭСО Групп
