КАРЕК-ИЙН ТАНХИМУУДЫН ХОЛБООНЫ АНХДУГААР УУЛЗАЛТ БОЛЖ, МҮХАҮТ 2026 ОНД ДАРГАЛНА
КАРЕК-ийн Танхимуудын холбооны анхдугаар уулзалт Улаанбаатар хотноо болж, Монголын Үндэсний Худалдаа Аж Үйлдвэрийн Танхим (МҮХАҮТ) 2026 онд тус холбоог даргалж, Пакистаны тал дэд даргаар ажиллахаар тогтов. Уулзалтын үеэр анхдугаар уулзалтын протоколд гарын үсэг зурж, цаашдын үйл ажиллагааны чиглэлээ тодорхойллоо.
Уг холбоог байгуулах тухай Харилцан ойлголцлын санамж бичигт есдүгээр сарын 30-ны өдөр гарын үсэг зурсан юм. Анхдугаар уулзалтаар бүс нутгийн бизнесийн хамтын ажиллагааг өргөжүүлэх, худалдаа, хөрөнгө оруулалтыг дэмжих асуудлыг хэлэлцэв.
Уулзалтыг МҮХАҮТ-ын Ерөнхийлөгч Б.Лхагважав нээж үг хэлсэн бөгөөд Эдийн засаг, хөгжлийн яамны Төрийн нарийн бичгийн дарга И.Батхүү оролцож, мэндчилгээ дэвшүүлэв.
МҮХАҮТ-ын Ерөнхийлөгч Б.Лхагважав хэлсэн үгэндээ КАРЕК-ийн орнуудын хувийн хэвшлийн хамтын ажиллагааг бодит үр дүнд хүргэхийн чухлыг онцлов. Тухайлбал, тээвэр, логистикийн коридорыг хөгжүүлэх, худалдааны саад бэрхшээлийг бууруулах, бизнесийн өрсөлдөх чадварыг нэмэгдүүлэх, экспорт болон технологийн хамтын ажиллагааг өргөжүүлэх шаардлагатайг тэмдэглэлээ. Мөн бид зөвхөн санал солилцдог бус, шийдэл гаргаж үр дүнд хүрдэг холбоо байх хэрэгтэй. Иймд хилийн боомт, гааль, стандарт, зөвшөөрөл зэрэг худалдаанд тулгарч буй саад бэрхшээлийг тодорхойлон, шийдвэрлэх гарцыг хамтран боловсруулах нь чухал” гэдгийг тэрбээр онцлоод, тээвэр, логистикийн үр ашгийг бараа бүтээгдэхүүн зах зээлд хэдий хугацаанд, ямар зардлаар, хэр найдвартай хүрч байгаагаар нь хэмжих шаардлагатайг тэмдэглэв.
КАРЕК-ийн Танхимуудын холбоо нь бүс нутгийн үндэсний танхимууд болон бизнесийн тэргүүлэх холбоодыг нэгтгэж, хувийн хэвшлийн оролцоог КАРЕК-ийн бодлого, хөтөлбөртэй уялдуулах зорилготой. Холбооны хүрээнд зах зээлийн мэдээлэл, туршлага солилцох, бизнес уулзалт, худалдааны үзэсгэлэн, төлөөлөгчдийн айлчлал зохион байгуулах чиглэлээр хамтран ажиллах юм.
КАРЕК нь 2001 онд байгуулагдсан бөгөөд Азийн хөгжлийн банк Нарийн бичгийн даргын үүргийг гүйцэтгэдэг бүс нутгийн эдийн засгийн хамтын ажиллагааны механизм юм. Тус хөтөлбөрт Афганистан, Азербайжан, БНХАУ, Гүрж, Казахстан, Киргизстан, Монгол Улс, Пакистан, Тажикистан, Туркменистан, Узбекистан гэсэн 11 гишүүн орон хамрагддаг. Монгол Улс тус хөтөлбөрт 2002 онд нэгдсэн бөгөөд энэ онд КАРЕК-ийн хамтын ажиллагааны 25 жилийн ой тохиож байна.
Түүнчлэн Монгол Улс 2025 онд КАРЕК-ийн түнш орнуудтай нийт 18.75 тэрбум ам.долларын худалдаа хийсний 99.36 хувийг БНХАУ-тай хийсэн худалдаа эзэлж байгаа нь бүс нутгийн бусад зах зээлтэй худалдаа, хөрөнгө оруулалтыг өргөжүүлэх боломж, шаардлагыг харуулж байна.
Ойн хүрээнд Сайд нарын бага хурал, Хөгжлийн түншүүдийн яриа хэлэлцээ, КАРЕК-ийн Бизнесийн форум, Хөрөнгийн зах зээлийн хөгжлийн форум зэрэг арга хэмжээг есдүгээр сарын 28-наас аравдугаар сарын 2-ны хооронд Улаанбаатар хотноо зохион байгуулж байна.
