МОНГОЛ-ХЯТАД-ОРОСЫН ХУДАЛДАА АЖ ҮЙЛДВЭРИЙН ТАНХИМУУДЫН 19 ДЭХ УДААГИЙН НЭГДСЭН ЧУУЛГАНААС ГАРГАХ ХАМТАРСАН ТУНХАГ БИЧИГ

Монголын Үндэсний Худалдаа Аж Үйлдвэрийн Танхим, Бүгд Найрамдах Хятад Ард Улсын Олон Улсын Худалдаа Дэмжих Хороо ба Оросын Холбооны Улсын Худалдаа Аж Үйлдвэрийн Танхимын 19 дэх удаагийн нэгдсэн чуулганаар дэлхийн эдийн засгийн өнөөгийн нөхцөл дэх гурван улсын эдийн засгийн байдал, эдийн засаг худалдааны харилцаан дах  цахим худалдааны үр нөлөө, шинжлэх ухаан хөдөө аж ахуй ба аж үйлдвэрийн салбарт хийх интеграци, аялал жуулчлал,  гурван улсын эдийн засгийн харилцааны чиг хандлага, танхимуудын үүрэг оролцоо, хамтын ажиллагааны талаар хэлэлцэж санал солилцов.

Монгол-Хятад-Орос танхимуудын харилцаа хамтын ажиллагаа, танхимуудаас зохион байгуулдаг төрийн өндөр дээд хэмжээний айлчлалын бизнесийн арга хэмжээнүүд, хоёр талт бизнес уулзалтууд, үзэсгэлэн худалдаа нь улс хоорондын эдийн засаг, худалдааны харилцаа, хөрөнгө оруулалтыг нэмэгдүүлэхэд тодорхой хувь нэмэр болж ирснийг тэмдэглэлээ.

“Хөгжил дэвшлийн төлөөх Бизнес, Танхим, Засгийн газрын түншлэл” сэдэв дор 2025 оны 9 сард болсон Дэлхийн танхимуудын 14 дэх удаагийн конгрессийн үед хэлцэгдсэн өөрчлөгдөж буй хандлага, орчинд нийцэх хэрэглэгч төвтэй танхим байх, гишүүдтэй харилцах болон ажил үйлчилгээ явуулахад дижитал арга хэрэгслийг нэвтрүүлэх, бизнес эрхлэгчдэд хэрэгцээтэй бүтээгдэхүүн үйлчилгээг хөгжүүлэхэд танхимууд илүү анхаарах, энэ талаар харилцан туршлагаа хуваалцах хэрэгтэй байгааг онцлов.

Улс хоорондын худалдаа, хөрөнгө оруулалтыг нэмэгдүүлэхийн тулд танхим хоорондын хамтын ажиллагааг улам бүр өргөжүүлэх, хэрэгжих боломжтой төсөл хөтөлбөрийг санаачлах, худалдаа бизнесийн харилцаанд тулгарч буй тодорхой асуудлуудыг шийдвэрлүүлэх чиглэлээр илүү анхаарал хандуулах шаардлагатайг хүлээн зөвшөөрөв.

Танхимуудын харилцаа, хамтын ажиллагааг бэхжүүлэх хүсэл эрмэлзлээ илэрхийлэн, улс хоорондын эдийн засаг худалдааны харилцааг харилцан үр ашигтай тогтвортой хөгжүүлэх, худалдааг хөнгөвчлөх, худалдаан дах саад тотгорыг бууруулах, худалдаа хөрөнгө оруулалтыг дэмжих, Худалдаа аж үйлдвэрийн танхимуудыг хөгжүүлэхийг зорилго болгон дараах зүйлсийг тунхаглаж байна. Үүнд:

1. Бизнесийн томоохон төслүүдийг хөрөнгө оруулагчдад сурталчлах, бизнес хөрөнгө оруулалтыг дэмжих хоёр ба гурван талт уулзалт арга хэмжээнүүдийг тогтмол зохион байгуулах;
2. Худалдаа бизнесийн харилцаанд тулгарч буй асуудлын талаар санал солилцож, асуудлыг тодорхойлон тус тусын төр засгийн байгууллагуудад танилцуулж шийдвэрлүүлэх чиглэлээр идэвхтэй хамтран ажиллах;
3. Худалдааг хөнгөвчлөх, техникийн саад тотгорыг бууруулах зорилгоор бүтээгдэхүүний чанар, эрүүл ахуй, стандарт, техникийн зохицуулалтын талаарх мэдээллийг шуурхай харилцан солилцож, бизнес эрхлэгчдэд хүртээмжтэй хүргэх;
4. Гурван улсын эдийн засгийн коридорын хөтөлбөрт тусгасан төслүүдэд болон эдийн засгийн коридорын дагуух чөлөөт бүсүүдэд хөрөнгө оруулах, үйл ажиллагаа явуулахад нь хөрөнгө оруулагч аж ахуйн нэгжүүдэд дэмжлэг үзүүлэх;
5. Барааны гарал үүслийн гэрчилгээг цахим хэлбэрээр солилцох, баталгаажуулалтын нэгдсэн цахим системээр дамжуулан харилцан хүлээн зөвшөөрөх тогтолцоог бүрдүүлэх;
6. Монгол Улсаас мах махан бүтээгдэхүүн, сүү, сүүн бүтээгдэхүүнийг ОХУ, БНХАУ-ын зах зээлд экспортлох, гуравдагч оронд экспортлоход ОХУ, БНХАУ-ын нутаг дэвсгэрээр дамжин өнгөрөх үеийн хяналт, шалгалт, хорио цээрийн шаардлагын асуудлыг шийдвэрлүүлэхэд дэмжлэг үзүүлэх;
7. Гурван улсын эдийн засаг, худалдаа, аж үйлдвэрийн салбарын тоо баримт болон бизнесийн орчны судалгааны үр  дүнг харилцан солилцох;
8. Хүлэмжийн хийн ялгарлыг бууруулах, ногоон санхүүжилт татах чиглэлээр аж ахуйн нэгжүүдэд зориулсан мэдээллийн ба зөвлөх үйлчилгээ үзүүлэх, харилцан туршлагаа солилцох, сайн туршлагыг түгээх;
9. Гишүүд, хэрэглэгчдийн хэрэгцээ шаардлагад нийцсэн бүтээгдэхүүн, үйлчилгээг үзүүлэх талаар туршлага солилцох, танхимын ажилтнуудыг солилцох хөтөлбөрийг санаачлан хэрэгжүүлэх;
10. Хил орчмын аялал жуулчлалыг хөгжүүлэх хүрээнд шинэ маршрут гаргах, бүтээгдэхүүн үйлчилгээг хөгжүүлэх, шаардлагатай арга хэмжээг авч хэрэгжүүлэх чиглэлээр хамтран ажиллах;
11. Олон улсын худалдааны тээвэрлэлт, тарифын гэнэтийн өөрчлөлтөөс үүдэлтэй маргааныг шүүхийн бус журмаар, олон улсын арбитрын дүрмийн дагуу шуурхай шийдвэрлэх чиглэлээр хамтран ажиллах;
12. Аж үйлдвэрийн эрхийг харилцан хүндэтгэн хамгаалах, оюуны өмчийн зөрчлөөс урьдчилан сэргийлэх болон мэдээлэл  туршлага солилцох замаар аж ахуйн нэгжүүдийн эрхийн хамгаалалтыг бэхжүүлэхэд чиглэлээр идэвхтэй хамтран ажиллах
13. Худалдаа, хөрөнгө оруулалтыг дэмжих олон улсын ба бүс нутгийн байгууллагуудын үйл ажиллагаанд идэвх санаачлагатай оролцох

МҮХАҮТ-ын Удирдах зөвлөлийн дарга бөгөөд Ерөнхийлөгч: Б.Лхагважав

Сибирийн Холбооны тойргийн Худалдаа, аж үйлдвэрийн танхимуудын холбооны Ерөнхийлөгч, "Омск мужийн Худалдаа, аж үйлдвэрийн танхим" холбооны Ерөнхийлөгч: Федулова Ольга

БНХАУ-ын Олон улсын худалдааг дэмжих хорооны ОХУ дахь Ерөнхий төлөөлөгч: Сиү Жин Ли