ОХУ-ЫН ХҮНС, ХӨДӨӨ АЖ АХУЙН САЛБАРЫН 33 КОМПАНИ МОНГОЛЫН ЗАХ ЗЭЭЛД БҮТЭЭГДЭХҮҮНЭЭ ТАНИЛЦУУЛЖ БАЙНА
ОХУ-ын Хөдөө аж ахуйн яам, Холбооны “Агроэкспорт” төвөөс зохион байгуулж буй Оросын хүнс, хөдөө аж ахуйн салбарын компаниудын бизнес айлчлал 2026 оны 9 дүгээр сарын 9–11-ний өдрүүдэд Улаанбаатар хотноо үргэлжилж байна. Бизнес айлчлалын хүрээнд Оросын үйлдвэрлэгчдийг Монголын импортлогч, дистрибьютер, бизнес эрхлэгчидтэй шууд холбон, худалдаа, нийлүүлэлт, хамтын ажиллагааны шинэ боломжийг нэмэгдүүлэхэд чиглэсэн уулзалт, хэлэлцээг зохион байгуулж байна.
Айлчлалын нээлтийн арга хэмжээ 9 дүгээр сарын 9-ний өдөр болж, ОХУ-аас Монгол Улсад суугаа Онц бөгөөд Бүрэн эрхт Элчин сайд Алексей Николаевич Евсиков, Монгол Улсын Хүнс, хөдөө аж ахуй, хөнгөн үйлдвэрийн яамны Бодлого,
төлөвлөлтийн газрын дарга Ц.Болорчулуун, ОХУ-ын Хөдөө аж ахуйн яамны дэргэдэх Холбооны “Агроэкспорт” төвийн дарга Илья Николаевич Ильюшин, МҮХАҮТ-ын Ерөнхийлөгч Б.Лхагважав болон холбогдох байгууллагуудын төлөөлөл оролцлоо.
МҮХАҮТ-ын Ерөнхийлөгч Б.Лхагважав нээлтийн арга хэмжээнд хэлсэн үгэндээ хүнс, хөдөө аж ахуйн салбар нь Монгол, Оросын худалдаа, эдийн засгийн хамтын ажиллагааг бодит үр дүнд хүргэх өндөр боломжтой салбарын нэг болохыг онцоллоо. Тэрээр хүнсний аюулгүй байдал, нийлүүлэлтийн тогтвортой байдлыг хангахын зэрэгцээ боловсруулах үйлдвэрлэлийг хөгжүүлэх, мал аж ахуй, хөдөө аж ахуйн гаралтай бүтээгдэхүүний экспортыг нэмэгдүүлэх нь Монгол Улсын хувьд чухал зорилт болохыг тэмдэглэв.
Түүнчлэн Монгол Улс болон Евразийн эдийн засгийн холбоо, түүний гишүүн орнуудын хооронд байгуулсан Түр худалдааны хэлэлцээр нь хоёр орны бизнес эрхлэгчдийн хамтын ажиллагааг өргөжүүлэх шинэ боломж бүрдүүлж байгааг онцолж, уг боломжийг бодит худалдаа, экспорт, импорт, хамтарсан үйлдвэрлэл, хөрөнгө оруулалт, бизнесийн түншлэл болгон хөгжүүлэхэд хувийн хэвшлийн идэвхтэй оролцоо, шууд харилцаа чухал болохыг онцоллоо.
Энэ удаагийн бизнес айлчлалд ОХУ-ын 33 компани оролцож байгаа бөгөөд үр тариа, ургамлын тос, мах, махан бүтээгдэхүүн, сүү, сүүн бүтээгдэхүүн, нарийн боов, шоколад, ундаа, гурил, хүнсний бэлэн бүтээгдэхүүн, загас, далайн бүтээгдэхүүн, малын тэжээл, бордоо зэрэг өргөн хүрээний бүтээгдэхүүнээ Монголын зах зээлд танилцуулж байна. Төлөөлөгчдийн бүрэлдэхүүнд “Мираторг”, “Черкизово”, “ВИОЛА”, “КАРАТ” зэрэг Оросын томоохон үйлдвэрлэгчид багтжээ.
Бизнес айлчлалын хүрээнд Оросын компаниуд Монголын импортлогч, дистрибьютер болон бизнес эрхлэгчидтэй B2B уулзалт, хэлэлцээ хийж, бүтээгдэхүүнээ танилцуулахын зэрэгцээ худалдаа, нийлүүлэлт, цаашдын хамтын ажиллагааны боломжийг хэлэлцэж байна.
МҮХАҮТ нь хоёр орны бизнес эрхлэгчдийн шууд харилцааг өргөжүүлэх, шинэ түншлэл, хамтарсан төсөл, хөрөнгө оруулалтыг дэмжих замаар Монгол, Оросын худалдаа, эдийн засгийн хамтын ажиллагааг өргөжүүлэх чиглэлд цаашид идэвхтэй хамтран ажиллана.
