Монголын Үндэсний Худалдаа Аж Үйлдвэрийн Танхим (МҮХАҮТ) болон Бүгд Найрамдах Индонез Улсаас Монгол Улсад хавсран суугаа Элчин сайдын яам хамтран “Монгол–Индонез бизнес уулзалт”-ыг зохион байгууллаа.

Монгол Улс, Бүгд Найрамдах Индонез Улсын хооронд дипломат харилцаа тогтоосны 70 жилийн ой тохиож буй энэ онд зохион байгуулсан тус уулзалтаар хоёр улсын худалдаа, хөрөнгө оруулалт, аялал жуулчлал болон бизнесийн хамтын ажиллагааг өргөжүүлэх боломжийн талаар танилцуулж, санал солилцлоо.

Уулзалтыг Бүгд Найрамдах Индонез Улсаас Монгол Улсад хавсран суугаа Онц бөгөөд Бүрэн Эрхт Элчин сайд Жауҳари Оратмангун, БНИУ-ын ЭСЯ-ны дэд Элчин сайд Др. Ирэн М. Хан болон МҮХАҮТ-ын Ерөнхийлөгч Б.Лхагважав нар нээж үг хэллээ.

Нээлтийн үеэр хоёр улсын олон жилийн найрсаг харилцааг худалдаа, хөрөнгө оруулалт, бизнесийн бодит хамтын ажиллагаагаар өргөжүүлэх, хувийн хэвшлийн шууд харилцааг нэмэгдүүлэхийн ач холбогдлыг онцолж, бизнес эрхлэгчдэд шинэ түншлэл тогтоох боломжийг бий болгоход анхаарах шаардлагатайг тэмдэглэв.

МҮХАҮТ-ын Ерөнхийлөгч Б.Лхагважав 2025 онд хоёр улсын худалдааны нийт эргэлт 47.4 сая ам.долларт хүрсэн хэдий ч Монголын экспорт 168 мянга орчим ам.доллар, Индонезоос хийсэн импорт 47.25 сая ам.доллар орчим байгааг дурдаад, энэ нь хоёр талын худалдааг өргөжүүлэх, Монголын экспортын боломжийг нэмэгдүүлэх орон зай байгааг харуулж буйг онцоллоо. Уулзалтын үеэр БНИУ-ын ЭСЯ-ны худалдааны атташе Жунита Сяартика Индонезийн зах зээл, бизнесийн орчин болон худалдааны боломжийн талаар танилцууллаа.

Мөн хоёр улсын компаниуд өөрсдийн үйл ажиллагаа, бүтээгдэхүүн, үйлчилгээгээ танилцууллаа. Үүнд Монголын талаас “Чандмани Консалтинг” ХХК, “Занаду Трэйвэл Монгол” ХХК, Индонезийн талаас PT. Strive, PT. Rempah Galih, PT. Bali Hai Brewing, PT. Bospres компаниуд тус тус оролцов.

Компанийн танилцуулгуудын үеэр хүнс, хөдөө аж ахуй, малын гаралтай бүтээгдэхүүн, халал махны нийлүүлэлт, аялал жуулчлал, уул уурхай, уул уурхайн тоног төхөөрөмж, эм, эмийн бүтээгдэхүүн, сэргээгдэх эрчим хүч зэрэг салбарын хамтын ажиллагааны боломжийг хөндөж ярилцлаа.

Түүнчлэн хоёр улсын аялал жуулчлалын компаниудыг шууд холбох, хамтарсан аяллын бүтээгдэхүүн бий болгох, харилцан сурталчилгаа хийх замаар жуулчдын урсгалыг нэмэгдүүлэх боломжийн талаар санал солилцлоо. Уулзалтын төгсгөлд оролцогчид цаашдын хамтын ажиллагаа, бизнесийн шууд холбоо, түншлэл хөгжүүлэх чиглэлээр санал солилцсон бөгөөд МҮХАҮТ-ын зүгээс Монгол, Индонезийн бизнес эрхлэгчдийг холбох, B2B уулзалт зохион байгуулах, худалдаа, хөрөнгө оруулалтын мэдээллээр хангах, бизнесийн түнш хайхад дэмжлэг үзүүлж ажиллахаа илэрхийллээ.

Ийнхүү хоёр улсын дипломат харилцааны 70 жилийн ойг тохиолдуулан зохион байгуулсан бизнес уулзалт нь компаниудад шууд харилцаа тогтоох, цаашдын хамтын ажиллагааны чиглэлээ тодорхойлох боломжийг бүрдүүллээ.