Монголын бизнес төлөөлөгчид Сингапурын Meinhardt Group-ийн удирдлагуудтай уулзлаа
Монголын Үндэсний Худалдаа Аж Үйлдвэрийн Танхим (МҮХАҮТ) болон Монголын бизнесийн төлөөлөл Сингапурын бизнес айлчлалын хүрээнд олон улсын инженер, зөвлөх үйлчилгээний тэргүүлэгч компаниудын нэг болох Meinhardt Group-ийн удирдлагуудтай уулзлаа.
Уулзалтаар Монгол Улсын барилга, дэд бүтэц, хот төлөвлөлт, ус, байгаль орчин болон төслийн менежментийн салбарын хөгжлийн боломж, олон улсын туршлага, инженерийн цогц шийдэл, зөвлөх үйлчилгээний чиглэлээр хамтран ажиллах боломжийн талаар санал солилцов.
МҮХАҮТ-ын Ерөнхийлөгч Б.Лхагважав, ЕНБДарга Б.Саруул болон Монголын бизнес төлөөлөгчдийг Meinhardt Group-ийн Группийн Гүйцэтгэх дарга (Group Executive Chairman) доктор Шахзад Насим, Группийн Гүйцэтгэх захирал (Group CEO) Омар Шахзад нар хүлээн авч, группийн үйл ажиллагаа, олон улсын төсөл хэрэгжүүлсэн туршлага болон инженерийн шийдлүүдийг танилцууллаа.
Meinhardt Group-ийн тухай
Meinhardt Group нь барилга, дэд бүтэц, хот төлөвлөлт, ус, байгаль орчин, төслийн болон барилгын менежментийн чиглэлээр инженерийн цогц шийдэл, зөвлөх үйлчилгээ үзүүлдэг Сингапурын томоохон инженерийн групп юм.
Тус групп нь дэлхийн 52 улсад салбар оффистой, 5,000 орчим ажилтантай бөгөөд жил бүр нийт 25 тэрбум ам.доллароос дээш үнийн дүн бүхий төслүүдэд зөвлөх үйлчилгээ үзүүлдэг байна.
Meinhardt Group нь инженерийн зураг төсөл, ерөнхий зөвлөх үйлчилгээ, мастер төлөвлөлт, төслийн болон барилгын менежмент зэрэг чиглэлээр үйл ажиллагаа явуулж, олон улсын хэмжээнд томоохон барилга байгууламж, дэд бүтцийн төслүүдэд мэргэжлийн үйлчилгээ үзүүлж ирсэн туршлагатай.
Тус группийн төв оффис 2010 онд Австралийн Мельбурн хотоос Сингапурт шилжсэн бөгөөд өдгөө Хятад, Ойрх Дорнод, Өмнөд болон Зүүн Өмнөд Ази, Их Британи зэрэг олон улсын зах зээлд үйл ажиллагаагаа өргөжүүлэн ажиллаж байна.
Meinhardt нь Сингапурын Эдийн засгийн хөгжлийн зөвлөл (EDB)-өөс “International Headquarters Award” хүртсэн тус улсын анхны инженерийн компани бөгөөд EDB-тэй хамтран “Smart Cities”, “Project Management and Construction Management” чиглэлээр мэргэшлийн төвүүд байгуулжээ.
Мөн ус, байгаль орчны чиглэлээр тусгай нэгж байгуулж, төрийн байгууллага, хотын захиргаа болон ус хангамжийн байгууллагын мэргэжилтнүүдэд менежмент, техникийн сургалт явуулах Water Training Centre-ийг байгуулсан байна.
Meinhardt Group-ийн Группийн Гүйцэтгэх захирал Омар Шахзад 2013 оноос группийн үйл ажиллагааг удирдаж байгаа бол Группийн Гүйцэтгэх дарга доктор Шахзад Насим нь стратегийн бодлого, бизнесийн өргөжилт, гол харилцагчид болон томоохон төслүүдийг хариуцан ажилладаг байна.
