МОНГОЛЫН КОМПАНИУД ХҮНИЙ ЭРХИЙН ЭРСДЭЛИЙГ ҮНЭЛЭХ ПРАКТИК ХЭРЭГЛЭГДЭХҮҮНТЭЙ БОЛЛОО
Монголын аж ахуйн нэгжүүд, тэр дундаа жижиг, дунд үйлдвэрүүд өөрийн үйл ажиллагаа болон нийлүүлэлтийн сүлжээнд хүний эрхийн эрсдэлийг тодорхойлох, үнэлэх, урьдчилан сэргийлэх, бууруулахад ашиглах “Хүний эрхийн магадлан шинжилгээний хэрэглэгдэхүүн” (HRDD Toolkit)-тэй боллоо.
Монголын Үндэсний Худалдаа, Аж Үйлдвэрийн Танхим (МҮХАҮТ) Европын Холбооны санхүүжилттэй SOCIEUX+ техникийн хамтын ажиллагааны хүрээнд энэхүү таван модуль бүхий хэрэглэгдэхүүнийг боловсруулсан бөгөөд бизнесийн байгууллагууд өдөр тутмын үйл ажиллагаандаа ашиглах боломжтой шалгах хуудас, үнэлгээний аргачлал, практик хэрэгсэл, жишээ, зөвлөмжүүдийг багтаасан байна.
HRDD Toolkit нь хариуцлагатай бизнесийн үйл ажиллагаа ба хүний эрхийн магадлан шинжилгээний танилцуулга, хүний эрхийн эрсдэлийн үнэлгээ, нийлүүлэлтийн сүлжээний магадлан шинжилгээ, гомдол барагдуулах механизм, жендерт мэдрэмжтэй магадлан шинжилгээ гэсэн таван үндсэн модулиас бүрдэнэ.
Ингэснээр аж ахуйн нэгжүүд хүний эрхийн эрсдэлийг зөвхөн тодорхойлох төдийгүй эрсдэлийн нөлөөллийг үнэлэх, урьдчилан сэргийлэх, бууруулах арга хэмжээ авах, гарсан зөрчлийг шийдвэрлэх механизмыг бүрдүүлэхэд уг хэрэглэгдэхүүнийг практикт ашиглах боломжтой болж байна.
Хэрэглэгдэхүүнийг боловсруулах ажлын хүрээнд олон улсын эксперт Жаклин Кацпжак /Польш/, Кирсти Макдоналд Меллор /Испани/ нар 2026 оны 9 дүгээр сарын 21-нээс 10 дугаар сарын 2-ны өдрүүдэд Монгол Улсад ажиллаж, төр, хувийн хэвшил, ажил олгогч, ажилтны төлөөлөл, олон улсын болон эрдэм шинжилгээний байгууллагуудтай уулзалт хийлээ.
Энэ хугацаанд Монголын Хөрөнгийн Бирж ХК, Монголын Үйлдвэрчний эвлэл, Монголын Ажил Олгогч Эздийн Нэгдсэн Холбоо, Рио Тинто Монгол ХХК, Голомт Банк, Гоёл Кашемир ХХК, Жендерийн Үндэсний Хороо, НҮБ-ын Хөгжлийн Хөтөлбөр, Олон Улсын Хөдөлмөрийн Байгууллага, ТЭСО Групп, Монгол Улсын Их Сургууль болон Европын Холбооны төлөөлөлтэй уулзаж, Монгол Улсын бизнес, хөдөлмөрийн орчин дахь хүний эрхийн асуудал, нийлүүлэлтийн сүлжээ, жендерийн мэдрэмжтэй байдал болон хариуцлагатай бизнесийн өнөөгийн нөхцөл, хэрэгцээ шаардлагыг судалсан байна.
Олон улсын туршлага болон Монголын бизнесийн орчны онцлогт тулгуурлан боловсруулсан энэхүү хэрэглэгдэхүүнийг 2026 оны 10 дугаар сарын 2-ны өдөр Европын Холбооноос Монгол Улсад суугаа Төлөөлөгчийн газарт танилцуулж, цаашдын хэрэгжилт, хамтын ажиллагааны талаар санал солилцлоо.
HRDD Toolkit нь Монголын аж ахуйн нэгжүүдэд хүний эрхийг хүндэтгэх зарчмыг бизнесийн өдөр тутмын үйл ажиллагаатай уялдуулах, хариуцлагатай бизнесийн соёлыг төлөвшүүлэх, цаашлаад олон улсын хүний эрхийн болон хариуцлагатай бизнесийн зарчим, шаардлагад нийцүүлэн ажиллахад нь практик дэмжлэг үзүүлэх ач холбогдолтой юм.
