МҮХАҮТ БНТУ-ын Танхим, Биржүүдийн холбоо (TOBB)-той хөгжүүлж буй хамтын ажиллагаагаа идэвхжүүлнэ
БНТУ-ын Танхим, Биржүүдийн холбоо (TOBB)-той уулзалт хийлээ. Уулзалтад Монголын талаас, БНТУ-д суугаа Онц бөгөөд Бүрэн эрхт Элчин сайд Г.Мөнхбаяр, МҮХАҮТ-ын Ерөнхийлөгч О.Амартүвшин, Ерөнхий нарийн бичгийн дарга С.Баясгалан, Монгол-Туркийн ХАҮТ-ын Монголын талын дарга С.Болдхэт, Туркийн талаас БНТУ-ын Танхим Биржүүдийн холбоо (TOBB)-ны Ерөнхийлөгч М.Рифат Хисарчиклиоглу, Ерөнхий нарийн бичгийн даргын орлогч Сарп Калкан, Европын холбоо болон Гадаад харилцааны газрын дарга Мустафа Байбуртлу, Олон улсын харилцааны газар, танхимуудын хоёр талт харилцааг хариуцсан мэргэжилтэн Басак Онур, Олон улсын харилцааны газар, Монгол Улсыг хариуцсан мэргэжилтэн Адем Кула нар байлцав.
Уулзалтын үеэр хоёр талын хамтын ажиллагааг идэвхжүүлж, бизнесийг дэмжих уулзалт, арга хэмжээг энэ онд зохион байгуулах, цаашид хамтран ажиллах чиглэлүүдийн талаар санал солилцов.
Тухайлбал, ХАҮТ-ын тухай хуулийг шинэчлэх болон Танхимын бодлогын өмгөөлөл, нөлөөллийн чиг үүргийг нэмэгдүүлэхэд БНТУ-ын Танхим Биржүүдийн холбооны зүгээс бүх талаар дэмжлэг үзүүлж ажиллах боломжтойгоо илэрхийлсэн юм. Танхимын бүтцийг шинэчлэх, чадавхжуулах чиглэлээр тус холбоо 1980 оноос эхлэн олон төсөл, хөтөлбөр хэрэгжүүлж ирсэн бөгөөд Бүгд Найрамдах Казахстан Улс, Узбекистан Улсын ХАҮТ-уудын хуулийг шинэчлэхэд туршлагаасаа хуваалцан, дэмжлэг үзүүлж ажилласан байна.
Танхимын мэргэжилтнүүд, бизнес эрхлэгчдийг чадавхжуулах хүрээнд БНТУ-ын Танхим Биржүүдийн холбооны дэргэдэх Их сургуультай хамтран ажиллах талаар ярилцлаа. МҮХАҮТ-ын дэргэдэх Бизнес академитай хамтран ажиллах, Монголын бизнес эрхлэгчдэд зориулсан сургалтын хөтөлбөр боловсруулах чиглэлээр цаашид холбогдон ажиллахаар тогтов.
Мөн хоёр орны худалдааны тэнцлийг хангах, Монголын талын экспортыг нэмэгдүүлэх чиглэлээр хөдөө аж ахуй, арьс шир, тээвэр логистик (агаарын, газрын ачаа тээвэр)-ийн салбаруудад хамтарч ажиллах зэргээр худалдаа, бизнесийн хамтын ажиллагааг идэвхжүүлэх төлөвлөгөө гарган ажиллах юм.
"Шинэ сэргэлтийн бодлого"-ын хүрээнд Төр-Хувийн хэвшил, хөрөнгө оруулагчдын түншлэлд тулгуурлан Монгол Улсын хөгжлийг хязгаарлагч зургаан багц асуудлыг шийдвэрлэх ажлын хүрээнд яригдаж буй дэд бүтэц, эрчим хүчний 94 төслийг тус улсын хөрөнгө оруулагчдад танилцуулах, 7 дугаар сард Анкара хотод дахин уулзалт зохион байгуулах, хамтран хэрэгжүүлэх арга хэмжээний нарийвчилсан төлөвлөгөө гаргах, 9 дүгээр сард Улаанбаатар хотод Турк-Монголын бизнес форумыг зохион байгуулахаар тохиролцов.
БНТУ-ын Танхим Биржүүдийн Холбоо нь 1950 онд байгуулагдсан бөгөөд тус улсын хувийн хэвшлийг төлөөлж буй хамгийн дээд эрх бүхий хуулийн этгээд юм. Мөн бүс нутгийн худалдаа, аж үйлдвэр, далайн худалдаа, түүхий эдийн биржүүд бүхий танхимуудыг нэгтгэсэн байдаг бөгөөд нийт 1.5 сая гишүүнтэй аж.
