“БИЗНЕСИЙН ТҮНШЛЭЛИЙГ БЭХЖҮҮЛЭХ НЬ” СЕМИНАРЫГ АМЖИЛТТАЙ ЗОХИОН БАЙГУУЛЛАА

Монголын Үндэсний Худалдаа Аж Үйлдвэрийн Танхим (МҮХАҮТ), Азийн хөгжлийн банк (АХБ), Дэлхийн банк групп (ДБГ) хамтран 2 жил тутам зохион байгуулдаг  “Бизнесийн Түншлэлийг бэхжүүлэх нь” семинарыг зохион байгууллаа. Семинарт 200 гаруй бизнес эрхлэгчид, аж ахуй нэгжийн төлөөллүүд оролцож, олон улсын санхүүжилттэй төсөл, хөтөлбөрүүдэд оролцох боломж, худалдан авах ажиллагааны талаар мэдээлэл авлаа.

Арга хэмжээний үеэр АХБ, ДБГ болон Олон улсын санхүүгийн корпорац (IFC)-ын төлөөлөгчид Монгол Улсад хэрэгжүүлж буй төсөл, хөтөлбөрүүд, тендерт оролцох боломж, санхүүжилтийн бүтээгдэхүүн, хөрөнгө оруулалтын шалгуур болон худалдан авах ажиллагааны шинэчлэлийн талаар танилцуулга мэдээлэл хийлээ.
Мөн тендерийн мэдээлэл хайх, өрсөлдөхүйц санал боловсруулах, худалдан авах ажиллагааны шаардлагыг хангах талаар практик зөвлөмж өгч, олон улсын санхүүжилттэй төслүүдэд амжилттай оролцсон аж ахуйн нэгжүүд туршлагаа хуваалцав.

Семинарын төгсгөлд оролцогчид АХБ болон Дэлхийн банкны мэргэжилтнүүдтэй ганцаарчилсан уулзалт хийж, сонирхож буй төсөл, тендерийн шаардлага болон оролцоотой холбоотой асуудлаар зөвлөгөө мэдээлэл авлаа.
Энэхүү арга хэмжээ нь Монголын аж ахуйн нэгжүүдийн олон улсын санхүүжилттэй төслүүдэд оролцох боломжийг нэмэгдүүлэх, тендерт өрсөлдөх чадавхыг бэхжүүлэх, хөгжлийн түнш байгууллагуудтай хамтын ажиллагааг өргөжүүлэх боломжийг бүрдүүллээ.