МОНГОЛ–СИНГАПУРЫН БИЗНЕС ФОРУМ СИНГАПУР УЛСАД ЗОХИОН БАЙГУУЛАГДЛАА
Монгол Улс, Бүгд Найрамдах Сингапур Улсын бизнес эрхлэгчдийн худалдаа, хөрөнгө оруулалт, байгаль орчин, уур амьсгалын өөрчлөлтийн чиглэлээрх хамтын ажиллагааг өргөжүүлэх, бизнесийн шинэ боломж нээх зорилготой Монгол–Сингапурын бизнес форум Сингапур Улсад зохион байгуулагдлаа.
Форумыг Монгол Улсаас Сингапур Улсад суугаа Элчин сайд Г.Уянга, Монгол Улсын Байгаль орчин, уур амьсгалын өөрчлөлтийн сайд Ц.Сандаг-Очир, Сингапур Улсын Хөдөлмөрийн асуудал эрхэлсэн төрийн сайд, Эрчим хүч, худалдаа, аж үйлдвэрийн сайд Фу Цэшян, Монголбанкны Тэргүүн дэд ерөнхийлөгч Э.Анар нарын мэндчилгээгээр нээв.
Мөн МҮХАҮТ-ын Ерөнхийлөгч Б.Лхагважав, Сингапурын Бизнесийн Холбооны дарга Марк Ли нар хоёр орны хувийн хэвшлийн хамтын ажиллагааг өргөжүүлэх, бизнесийн харилцааг бэхжүүлэхийн ач холбогдлыг онцоллоо.
Форумын хүрээнд МҮХАҮТ болон Сингапурын Бизнесийн Холбоо хамтын ажиллагааны санамж бичиг байгуулж, хоёр орны бизнесийн харилцааг өргөжүүлэх, харилцан ашигтай түншлэлийг хөгжүүлэх чиглэлээр хамтран ажиллахаар боллоо. Түүнчлэн Монгол Улсын Харилцаа холбооны зохицуулах хорооны дарга Ж.Бат-Эрдэнэ, Мета компанийн Өмнөд болон Төв Азийн бүсийн олон нийтийн бодлогын захирал Юэн Тинг Чай нар мөн хамтын ажиллагааны санамж бичигт гарын үсэг зурав.
Форумын гол сэдвүүдийн нэг нь Монгол Улс, Сингапур Улсын хооронд байгуулсан нүүрстөрөгчийн кредитийн хамтын ажиллагааг хэрэгжүүлэх тухай хэлэлцээр байлаа. Энэ хүрээнд нүүрстөрөгчийн зах зээлийн хөгжил, хэлэлцээрийн хэрэгжилт болон бизнесийн боломжийн талаар Сингапурын Эрчим хүч, худалдаа, аж үйлдвэрийн яамны Нүүрстөрөгчийн зах зээлийн хэлтсийн захирал Флора То, Үндэсний байгаль орчны агентлагийн Нүүрстөрөгчийн төлөвлөлтийн хэлтсийн туслах менежер Кит Нонис нар мэдээлэл өгч, мэргэжлийн санал зөвлөмжөө хуваалцлаа.
Мөн Монгол Улсын Хөгжлийн банкны Гүйцэтгэх захирал С.Баатарсүрэн, Монголын Ипотекийн Корпорацийн захирал Б.Гантулга нар ипотекийн санхүүжилтийн өнөөгийн нөхцөл байдал, цаашдын боломжийн талаар танилцуулж, санхүүжилтийн орчныг сайжруулах, хөрөнгө оруулалт татах асуудлыг хөндлөө.
Форумын төгсгөлд хоёр орны бизнес эрхлэгчид салбарын чиглэлээр санал солилцож, худалдаа, хөрөнгө оруулалтын шинэ боломжийг тодорхойлох, харилцан ашигтай түншлэл тогтоох зорилгоор бизнес хоорондын (B2B) уулзалт хийлээ.
Энэхүү форум нь Монгол, Сингапурын бизнесийн харилцааг бэхжүүлэх, хувийн хэвшлийн хамтын ажиллагааг өргөжүүлэх, хоёр орны бизнес эрхлэгчдэд шинэ түншлэл, хөрөнгө оруулалтын боломж бүрдүүлэхэд чиглэсэн ач холбогдолтой арга хэмжээ боллоо.
