ISO/IEC 17025 СТАНДАРТЫН АРГЫН БАТАЛГААЖУУЛАЛТ, НОТЛОГООНЫ ПРАКТИК СУРГАЛТ БОЛЛОО
МҮХАҮТ-ын Итгэмжлэгдсэн лабораториудын зөвлөлөөс лабораторийн шинжилгээний үр дүнгийн найдвартай байдал, тогтвортой чанарыг хангах зорилготой “ISO/IEC 17025 – Аргын баталгаажуулалт ба нотолгоо” 2 өдрийн практик сургалтыг зохион байгууллаа.
Энэ онд хоёр дахь удаагаа зохион байгуулагдсан тус сургалтаар ISO/IEC 17025 стандартын шаардлагын дагуу шинжилгээний аргыг баталгаажуулах, аргын тохиромжтой байдлыг нотлох, хэмжилтийн алдаа болон хэлбэлзлийг үнэлэх, шинжилгээний үр дүнгийн найдвартай байдлыг хангах арга зүйд суралцав. Сургалтын хүрээнд оролцогчид стандартын шаардлагыг лабораторийн өдөр тутмын үйл ажиллагаанд хэрэгжүүлэх, шинжилгээний аргаас үүдэх эрсдэлийг эрт илрүүлэх, алдаанаас урьдчилан сэргийлэх, үр дүнгийн чанарыг тогтвортой хянах практик мэдлэг, ур чадвараа дээшлүүллээ.
Сургалтад “Энержи Ресурс”, “Эрдэнэт үйлдвэр”, “СЖС Ай Эм Эм И Монголиа” ХХК, “Сүү” ХК, “Айвико”, “М-Си-Эс Интернэйшнл”, “М ТИ ЭС” ХХК зэрэг байгууллагын лабораторийн 21 мэргэжилтэн хамрагдав.
Хоёр өдрийн сургалтыг “Инно” лабораторийн ахлах химич Г.Болдбаатар, “АПУ” ХК-ийн Төв лабораторийн химич Х.Жаргал нар удирдан явуулж, мэргэжлийн мэдлэг, практик туршлагаа хуваалцлаа.
Тус сургалт нь лабораторийн мэргэжилтнүүдийн аргын баталгаажуулалт, нотолгоо бүрдүүлэх чадавхыг бэхжүүлж, шинжилгээний үр дүнгийн үнэн зөв, найдвартай байдлыг хангах, лабораторийн чанарын удирдлагын тогтолцоог сайжруулахад чиглэснээрээ ач холбогдолтой юм.
