Истанбул хотын Худалдааны танхимын гишүүдтэй бизнесийн уулзалтууд хийлээ
Монголын үндэсний худалдаа, аж үйлдвэрийн танхимаас БНТУ-ын Истанбул хотод зохион байгуулж буй "Бизнес форум"-ын хүрээнд Монголын аж ахуйн нэгжүүдийн төлөөлөл, бизнес эрхлэгчид Истанбул хотын Худалдааны танхимын гишүүдтэй бизнесийн уулзалтууд хийлээ.
Тус бизнес уулзалтад Монголын талаас барилга, уул уурхай, ноос ноолуур, арьс шир, эрүүл мэнд, мах, махан бүтээгдэхүүн, хүнсний бүтээгдэхүүний худалдаа, тээвэр логистикийн үйл ажиллагаа эрхлэгч 15 компанийн 30 гаруй төлөөлөгч, Туркийн талаас Монгол Улстай худалдаа, эдийн засаг, хөрөнгө оруулалт, бизнесийн салбарт хамтран ажиллах сонирхолтой 100 гаруй аж ахуйн нэгжийн төлөөлөл оролцов.
МҮХАҮТ Истанбул хотын Худалдааны танхимтай хамтран ажиллах санамж бичгийг Мягмар гарагт үзэглэсэн бөгөөд хоёр байгууллагын хамтын ажиллагааны хүрээнд цаашид олон арга хэмжээг зохион байгуулахаар төлөвлөж байна.
