БНТУ-ын Олон Улсын Эдийн засгийн харилцааны зөвлөл /DEIK/-тэй албан уулзалт хийв
Монгол Улсаас БНТУ-д суугаа Онц бөгөөд Бүрэн эрхт Элчин сайд Г.Мөнхбаяр, Истанбул хотноо суугаа Ерөнхий консул Ш.Хишигсүрэн, МҮХАҮТ-ын Ерөнхийлөгч О.Амартүвшин, Ерөнхий нарийн бичгийн дарга С.Баясгалан нар БНТУ-ын Олон Улсын Эдийн засгийн харилцааны зөвлөл /DEIK/-ийн Турк-Монголын бизнес зөвлөлийн Туркийн талын Ерөнхийлөгч Халил Авчи, дэд ерөнхийлөгч Ченгиз Гул, Махмут Эр болон Гүйцэтгэх зөвлөлийн төлөөлөгчидтэй уулзаж, цаашдын хамтын ажиллагааны талаар санал солилцлоо.
БНТУ-ын Олон Улсын Эдийн засгийн харилцааны зөвлөл /DEIK/ нь 1986 онд тус улсын хувийн хэвшлийн олон улсын эдийн засгийн харилцааг зохион байгуулах зорилгоор байгуулагдсан бөгөөд 2014 онд бүтцийн өөрчлөлт хийж, хувийн хэвшлийн олон улсын эдийн засгийн харилцааг явуулах үүргийг хүлээн, бусад бизнес зөвлөлүүд болон бизнесийн байгууллагуудыг нэгтгэсэн зөвлөл болсон аж.
БНТУ-ын Олон Улсын Эдийн засгийн харилцааны зөвлөл /DEIK/-ийн Турк-Монголын бизнес зөвлөлийн Туркийн талын Ерөнхийлөгч Халил Авчи цар тахлын үеэр ч харилцаа, хамтын ажиллагаагаа үргэлжлүүлж, цахим арга хэмжээ зохион байгуулж байсныг уулзалтын эхэнд дурдаад цаашид хоёр орны хооронд чөлөөт худалдааны гэрээ байгуулахад МҮХАҮТ-ын зүгээс дэмжлэг үзүүлж ажиллахыг хүсэв.
МҮХАҮТ-ын Ерөнхийлөгч О.Амартүвшин хэлэхдээ, хоёр байгууллагын хамтын ажиллагаа 2001 онд эхэлсэн. Турк улстай барилга, арьс шир, мал аж ахуй, уул уурхай, ноос ноолуур, аялал жуулчлалын салбаруудад хамтран ажиллах боломж их. Түүнчлэн агаарын шууд карго нэвтэрч байгаа нь худалдаа, эдийн засгийн хамтын ажиллагаанд том түлхэц болно гэлээ.
Цаашид талууд харилцан мэдээллээ шуурхай солилцох, хөрөнгө оруулалтын төсөл хөтөлбөрүүдийн талаар гишүүддээ танилцуулах, Туркийн бусад хотуудад Монгол Улсыг сурталчилсан арга хэмжээг хамтран зохион байгуулах талаар ярилцлаа.