Истанбул хотын Худалдааны танхимтай хамтран ажиллана
МҮХАҮТ-ын Ерөнхийлөгч О.Амартүвшин, БНТУ-ын Истанбул хотын Худалдааны танхимын Ерөнхийлөгч Шекиб Авдагич нар Хамтын ажиллагааны санамж бичигт гарын үсэг зурлаа.
140 гаруй жилийн түүхтэй, 650 мянга орчим аж ахуй нэгжийн гишүүнчлэлтэй Истанбул хотын худалдааны танхимын Ерөнхийлөгч Шекиб Авдагич санамж бичиг байгуулах үеэрээ хоёр орны түүхэн холбоо найрсаг харилцааны талаар дурдаад, тээвэр, логистикийн асуудлыг шийдэж хөгжүүлвэл хамтын ажиллагаанд асар их боломж байгааг цохон тэмдэглэв.
Санамж бичгийн хүрээнд олон талт арга хэмжээг хамтран зохион байгуулах төдийгүй Истанбул хотын Худалдааны танхимын дэргэдэх Их сургуульд оюутан суралцуулах, МҮХАҮТ-ын дэргэдэх Бизнес академитай хамтран ажиллах, Турк жуулчдад Монгол орны аялалыг сурталчлах, эрүүл мэндийн салбарт нэгдсэн арга хэмжээг зохион байгуулах боломжтойг мөн онцолсон юм.