“Монголын гоо сайхны бүтээгдэхүүнийг Европын холбооны улсууд руу экспортлох үйл ажиллагааг сайжруулах” сургалт боллоо

Европын Холбооны санхүүжилтээр Монголын Үндэсний Худалдаа Аж Үйлдвэрийн Танхим, “Монголын экспортын кластеруудын сүлжээ” ТББ-тай хамтран хэрэгжүүлж буй “Монгол Улсын худалдаанд дэмжлэг үзүүлэх” төслийн хамтын ажиллагаа, түншлэлийн хүрээнд энэ онд нийт есөн багц сургалт, семинар зохион байгуулна. Дээрх сургалтуудын эхнийх “Монголын гоо сайхны бүтээгдэхүүнийг ЕХ-руу экспортлох үйл ажиллагааг сайжруулах нь” сэдэвт сургалт өнөөдөр болж, “Монголын Гоо сайхны бүтээгдэхүүний кластер” ТББ-ын гишүүн байгууллагуудын 25 төлөөлөл танхим болон цахимаар оролцлоо.

Европын Холбооноос Монгол Улсад суугаа Төлөөлөгчийн газрын Төсөл хариуцсан менежер М.Бямбарагчаа уг арга хэмжээг нээж хэлсэн үгэндээ, зохион байгуулагчдын зүгээс дээрх үйл ажиллагаагаар дамжуулан Монгол Улсын экспортын үйл ажиллагаанд тулгамдаж буй асуудлуудын талаар бодит мэдээлэл, цаашид дэмжлэг авах шаардлагатай тодорхой хүсэлтийг хүлээн авч, шийдлүүдийг  удахгүй хэрэгжиж эхлэх дараагийн Худалдааны төсөлд тусган хэрэгжүүлэхээр төлөвлөж байгаагаа онцлов.

МҮХАҮТ, Монголын экспортын кластеруудын сүлжээний гишүүдийн мэдээлэл сурталчилгааг тогтвортой нэмэгдүүлэх зорилгоор цуврал сургалтуудыг зохион байгуулах бөгөөд сургалтыг хоёр үе шаттай явуулах юм.

Эхний шат нь кластер бүрийн сонгогдсон гишүүдэд зориулсан, олон улсын мэргэжилтнүүд, бизнесийн нийгэмлэгийн төлөөллийн оролцоог хангасан, “Зочин илтгэгч”-тэй таван семинар зохион байгуулах бол хоёр дахь шатанд сонгогдсон төлөөлөгчид өөрийн олсон мэдлэгээ бусад гишүүд болон боломжит экспортлогчдод түгээх зорилгоор кластерын түншүүдтэйгээ нэмэлт дөрвөн семинар буюу дугуй ширээний ярилцлага зохион байгуулах юм.