Ташкент хотод “Узбекистан- Монголын ажил хэргийн бизнес форум” боллоо
Монголын Үндэсний Худалдаа Аж Үйлдвэрийн Танхим, Узбекистан Улсын Худалдаа аж үйлдвэрийн танхим хамтран “Узбекистан-Монголын бизнес форум”-ыг Ташкент хотноо анх удаа амжилттай зохион байгууллаа.
Форумд МҮХАҮТ-ын Ерөнхийлөгч О.Амартүвшин, Гадаад харилцааны дэд сайд Б.Мөнхжин, Узбекистаны ХАҮТ-ын дэд дарга Даврон Абдужаловича, Монгол Улсаас мах, махан бүтээгдэхүүний экспортлогч, нефть импортлогч, хүнсний бүтээгдэхүүний худалдаа, тээвэр логистикийн үйл ажиллагаа эрхлэгч 10 гаруй компанийн 15 төлөөлөгч, Бүгд Найрамдах Узбекистан Улсын талаас мөн дээрх чиглэлийн 20 компанийн төлөөлөл оролцов.
МҮХАҮТ-ын Ерөнхийлөгч О.Амартүвшин тус форумыг нээж хэлсэн үгэндээ “Цар тахлын нөхцөл байдлаас үүдэн дэлхий дахинд бий болсон эдийн засаг, тээвэр, логистикийн шинэ нөхцөл байдалд, геополитикийн хурцадмал асуудлын үед энэхүү форумыг зохион байгуулж байгаа нь өндөр ач холбогдолтой гэдгийг тодотгоод МҮХАҮТ-ын зүгээс цаашид Узбекистан Улсын ХАҮТ болон хамтран ажиллагч талуудтай худалдаа, эдийн засгийн хамтын ажиллагааг идэвхжүүлж, хоёр улсын бизнес эрхлэгчдийн хооронд хамтын ажиллагааг өргөжүүлэх, тээвэр логистикийн асуудлуудыг шийдвэрлэх чиглэлээр нягт хамтран ажиллах болно” гэв.
Монгол Улсаас Узбекистан Улс руу 2021 оны байдлаар 376.47 мянган ам.долларын үнийн дүнтэй малын дайвар бүтээгдэхүүн, боодлын хуванцар хайрцаг экспортолсон бол 3,453.05 мянган ам.долларын үнийн дүнтэй шоколад, сигар, янжуур тамхи болон хатаасан жимс импортложээ.
“Узбекистан-Монголын бизнес форум”-ын үеэр цаашид хоёр орны худалдаа, эдийн засгийн хамтын ажиллагааг идэвхжүүлэх, бизнесийн салбаруудад хэрхэн хамтран ажиллах боломж, нөхцөлүүдийн талаар ярилцаж, төгсгөлд нь B2B уулзалт зохион байгууллаа.
