МҮХАҮТ-ын Ерөнхийлөгч О.Амартүвшин Алматы хотын бизнес эрхлэгчдийн танхимын даргатай уулзлаа
МҮХАҮТ-ын Ерөнхийлөгч О.Амартүвшин болон Монголын бизнес эрхлэгчдийн төлөөлөл Бүгд Найрамдах Казахстан Улсын Алматы хотын Бизнес эрхлэгчдийн танхимын дарга Айтуар Кошмамбетов, Бүгд Найрамдах Казахстан Улсын Гадаад худалдааны танхимын төлөөлөгч Акеркин Эралиева нартай уулзалт хийлээ.
Уулзалтын үеэр МҮХАҮТ, Aлматы хотын Бизнес эрхлэгчдийн танхим хооронд хамтран ажиллах санамж бичиг байгуулах, энэ оны 10 дугаар сард хоёр орны хамтарсан бизнес форумыг Монгол Улсад зохион байгуулахад хамтарч ажиллах талаар санал солилцов.
Хоёр орны нийт худалдааны эргэлт 2021 оны 12 сарын байдлаар 21 сая ам.доллар, манай улсаас хүнсний бүтээгдэхүүн, адууны мах, хивс, хивсэнцэр экспортолж байгаа бол Казахстанаас гурилан бүтээгдэхүүн, цагаан будаа, янжуур зэргийг импортолж байна. Түүнчлэн тус улсын 100 хувийн болон хамтарсан хөрөнгө оруулалттай 74 аж ахуйн нэгж Монгол Улсад байгуулагдсан байна.
Уулзалтын төгсгөлд МҮХАҮТ-ын Ерөнхийлөгч О.Амартүвшин Алматы хотын Бизнес эрхлэгчдийн танхимын дарга Айтуар Кошмамбетовыг 9 дүгээр сард зохион байгуулагдах Монгол Улс- ОХУ- БНХАУ-ын Танхимуудын дээд хэмжээний уулзалтад оролцохыг урилаа.
