Бизнес эрхлэгчдэд зориулсан “ковидын дараах бизнесийг эрчимжүүлэх менежментийн хөтөлбөр” сургалт эхэллээ
Монголын Үндэсний Худалдаа Аж Үйлдвэрийн Танхимын “1000 СЕО, 1000 ХҮЧИРХЭГ КОМПАНИ” хөтөлбөрийн хүрээнд Нийслэлийн Засаг дарга бөгөөд Улаанбаатар хотын Захирагч Д.Сумъяабазарын дэмжлэгтэйгээр бизнесийн бүх салбарын жижиг, дунд үйлдвэр, үйлчилгээ эрхлэгчдэд зориулсан “Ковидын дараах бизнесийг эрчимжүүлэх” менежментийн хөтөлбөрийг "Нийслэлийн жижиг, дунд үйлдвэр, үйлчилгээг дэмжих төв" НӨҮГ-тэй хамтран хэрэгжүүлж байна.
Уг хөтөлбөрийн эхний сургалт өнөөдөр МҮХАҮТ-д эхэлсэн бөгөөд сургалт 5 долоо хоногийн турш танхим болон цахим хосолсон хэлбэрээр явагдах юм. Хөтөлбөрийн эхний элсэлтэд 20 гаруй жижиг, дунд үйлдвэр, үйлчилгээ эрхлэгч хамрагдаж байна.
Английн Small Business Charter-аар итгэмжлэгдсэн “London South Bank University” доктор М.Саранзаяагаар удирдуулан, туршлагатай менторууд болон МҮХАҮТ-ын дэргэдэх Бизнес Академи хамтран “Ковидын дараах бизнесийг эрчимжүүлэх менежментийн хөтөлбөр”-ийг боловсруулжээ.
Хөтөлбөрт хамрагдсанаар:
- Өөртэйгөө ижил болон илүү түвшний манлайлагчдаас суралцах, хамтран ажиллах, бизнесээ өргөжүүлэх, салбар дахь танилын хүрээгээ тэлэх,
- Өөрийн бодит бизнест тулгамдаж буй асуудлуудыг шийдвэрлэхэд менторуудаас зөвлөгөө авах,
- Менторууд болон Бизнес Академиудтай хамтран өөрийн бизнесийг өргөжүүлэх, нарийвчилсан төлөвлөгөөгөө гаргах,
- Бизнесээ мэргэжлийн түвшинд удирдах ур чадварт суралцах давуу талтай.
Хөтөлбөрт хэн оролцох боломжтой вэ?
Бүх салбарын жижиг дунд бизнес эрхлэгчид, удирдагчид болон ахлах менежерүүд оролцох боломжтой бөгөөд дараах шаардлагыг хангасан байна.
- Жижиг дунд үйлдвэрийн (ЖДҮ) үүсгэн байгуулагч, захирал эсвэл удирдлагын багийн гишүүн байх
- Нэгээс доошгүй жил үйл ажиллагаа явуулсан байх
- Сургалтад бүрэн хамрагдах зорилготой байх
Сургалт явагдах хэлбэр:
- Бизнесийн удирдагчдад тулгарч буй бодит нөхцөл байдалд сургалтаар заасан ойлголтуудыг хэрэгжүүлэх боломжийг олгох үүднээс онлайн болон танхимын хичээлүүдийн зэрэгцээ кейс судлах семинар хичээлүүдийг хослуулан явуулна.
- Сургалтын төгсгөлд та өөрийн бизнесээ удирдан чиглүүлж хөгжүүлэхэд тань бодитоор туслах “Бизнесийн өсөлтийн үйл ажиллагааны төлөвлөгөө”-г боловсруулсан байх болно.
- Хөтөлбөрийн турш ментор тань таныг дэмжихээс гадна ижил түвшний удирдлагаас суралцах, тантай адил бусад бизнес эрхлэгчидтэй холбоо тогтоох боломжтой болно.