“Дэлхийн банк, азийн хөгжлийн банкны бизнесийн боломж” сургалт, уулзалт боллоо
Монголын Үндэсний Худалдаа Аж Үйлдвэрийн Танхим, Азийн Хөгжлийн Банк, Дэлхийн Банктай хамтран “ДЭЛХИЙН БАНК, АЗИЙН ХӨГЖЛИЙН БАНКНЫ БИЗНЕСИЙН БОЛОМЖ” мэдээлэл олгох сургалт, уулзалтыг зохион байгууллаа. МҮХАҮТ-ын Ерөнхийлөгч О.Амартүвшин, Дэлхийн банкны Монгол Улс дахь суурин төлөөлөгч ноён Андрей Михнев, Азийн хөгжлийн банкны Монгол Улс дахь суурин төлөөлөгч ноён Павит Рамачандран, ЭЗХЯамны Хөрөнгө оруулалтын бодлогын газрын дарга Б.Анар болон албан бусад хүмүүс, бизнес эрхлэгчдийн төлөөллүүд уулзалтад оролцов.
Дэлхийн банк, Азийн хөгжлийн банк нь Монгол Улсын сүүлийн 30 жилийн хөгжлийн түүхэнд хамгийн гол хөгжлийн санхүүжилтийн донор байгууллагууд байж, хөгжлийн үе шат бүрт эдийн засгийн хөгжлийг эрчимжүүлэх, ядуурлыг бууруулах, хөдөлмөр эрхлэлтийг нэмэгдүүлэх, байгаль орчныг хамгаалах, дэд бүтцийг хөгжүүлэх зэрэг нийгэм, эдийн засагт тулгамдаж буй асуудлуудыг шийдвэрлэх замаар хөгжлийг хурдасгахад үйл ажиллагаа чиглүүлж ирсэн гэдгийг МҮХАҮТ-ын Ерөнхийлөгч О.Амартүвшин арга хэмжээг нээж хэлсэн үгэндээ онцолсон юм.
Мөн тэрээр, олон улсын донор байгууллагуудын төсөл хөтөлбөрүүдийг хэрэгжүүлэхэд мэдээ, мэдээллийн дутмаг байдал, компаниудын туршлага зэрэг олон хүчин зүйлээс шалтгаалан хувийн хэвшлийн оролцоо хязгаарлагдмал байдаг гэсэн сөрөг ойлголт дотоодын бизнес эрхлэгчдийн дунд түлхүү бий болсон байдаг. Гэтэл Монгол Улсад хэрэгжиж буй олон улсын байгууллагуудын буцалтгүй тусламжийн болон зээлийн төсөл бүр дотоодын аж ахуй нэгж, мэргэжилтнүүдэд нээлттэй зарлагдаж, сонгон шалгаруулалтыг холбогдох журмын дагуу зохион байгуулдаг. Гол нь худалдан авах ажиллагаанд хэрхэн оролцох, ямар дүрэм журмаар явагдах, мөн ажил гүйцэтгэх явцад байгаль орчин, нийгмийн ямар дүрэм журмуудыг баримтлах шаардлагатай байдаг нь дотоодын худалдан авах ажиллагааны дүрэм, журмаас харьцангүй өөр байдгаас шалтгаалан бизнес эрхлэгчид худалдан авах ажиллагаанд оролцохоос татгалзах, оролцоод шалгуур хангахгүй байх зэрэг олон асуудлууд гарсаар байдаг гэв.
Сургалт, уулзалтын үеэр Дэлхийн банк, Азийн хөгжлийн банкнаас хэрэгжүүлж буй төслүүдийн мэдээлэл, худалдан авах ажиллагааны талаар шаардлагатай чадавх, худалдан авах ажиллагаанд хэрхэн оролцох, ямар дүрэм журмаар явагдах, ажил гүйцэтгэх явцад байгаль орчин, нийгмийн ямар дүрэм журмуудыг баримтлахтай холбоотой илтгэлүүдийг танилцуулж, нээлттэй хэлэлцүүлэг өрнүүллээ.
