МҮХАҮТ-ын Ерөнхийлөгч О.Амартүвшин Бүгд Найрамдах Социалист Вьетнам Улсаас Монгол Улсад Суугаа Онц Бөгөөд Бүрэн Эрхт Элчин Сайд Эрхэмсэг Ноён Зоан Хань Дам-ыг хүлээн авч уулзлаа
Монгол Улс Бүгд Найрамдах Социалист Вьетнам Улстай уламжлалт найрсаг харилцаатай бөгөөд цаашид худалдаа, эдийн засаг, аялал жуулчлалын харилцааг идэвхжүүлж, хоёр улсын хамтын ажиллагааг өргөжүүлэх талаар санал солилцлоо.
Монгол улс болон Вьетнам улсын аль алинд нь цар тахлын үеийн хорио, хязгаарлалтууд бүрэн цуцлагдаж, хамтын ажиллагаа өрнүүлэхэд харьцангуй таатай үе ирж буйтай уялдуулан эдийн засгийн хөдөлгөгч хүч болсон бизнес эрхлэгчдийн харилцан айлчлалуудыг зохион байгуулахаар төлөвлөөд байна.
Аялал жуулчлалыг хөгжүүлэх чиглэлээр долоо хоног бүр тусгай үүргийн нислэг үйлдэж эхэлсэн нь худалдаа, эдийн засаг, аялал жуулчлалыг эрчимжүүлэхэд маш чухал хөшүүрэг болж байна. Энэ оны 6-дугаар сард Вьетнам улсаас 100 гаруй бизнес эрхлэгчдийн төлөөлөл Монгол улсад айлчлан хамтарсан бизнес форум, нетворкинг арга хэмжээг зохион байгуулахаар товлолоо. Тус бизнес айлчлалаар уул уурхайн бүтээгдэхүүн, мах махан бүтээгдэхүүн, арьс шир, барилгын материалын импорт, нэхмэл сүлжмэл эдлэл, жимс жимсгэний экспорт хийх сонирхолтой Вьетнам компаниуд Монголын аж ахуйн нэгжүүдтэй уулзаж бизнесийн шинэ харилцаа, түншлэлийн эхлэлийг тавих юм.