МҮХАҮТ-ын Ерөнхийлөгч О.Амартүвшин "Цалуут импекс" ХХК-ийн мах, махан бүтээгдэхүүн боловсруулах үйлдвэртэй танилцлаа
Монгол махыг дэлхийн жишигт уриатай "Цалуут импекс" ХХК 100 хувь дотоодын хөрөнгө оруулалттай, гарал үүсэл нь тодорхой, эрүүл ахуйн шаардлага, стандартыг бүрэн хангасан үйлдвэрийг ашиглалтад оруулсан ч махны экспорт хязгаарлагдсантай холбоотойгоор үйлдвэрийнхээ нийт хүчин чадлын 20 гаруй хувиар л ажиллаж байна гэж компанийн гүйцэтгэх захирал Д.Галдандорж хэлэв.
Тус компанийн хувьд үйлдвэр нь угтвар нөхцөлийг хангасан, олон улсын чанарын стандарт ISO22000, ISO9001 болон үйлдвэрлэлийн удирдлагын HACCP стандартыг нэвтрүүлснээрээ онцлог. Ийм стандартуудыг нэвтрүүлсэн үйлдвэрт үйлдвэрлэж, лабораторийн шинжилгээнд бүрэн хамрагдсан, үйлдвэрийн аргаар бэлтгэн боловсруулсан шинэ мах, махан бүтээгдэхүүнүүдээ "Хүрээ Маркет"-аар дамжуулан хэрэглэгчдэд хүргэдэг байна. Мөн нөөцийн махны тодорхой хувийг бэлтгэн гэрээт дэлгүүрүүдэд түгээж байна гэлээ.
НҮБ-ын Худалдаа, хөгжлийн бага хурал (НҮБ-ын ХХБХ)-аас боловсруулсан “Монгол Улсын мах, махан бүтээгдэхүүний экспортын гол зах зээлийн шинжилгээ”-ний тайланд дурдсанаар, Монгол Улсад жилд 14 сая малыг хүнсний хангамжид зориулан нядалж байгаа бөгөөд зөвхөн 10 орчим хувийг зориулалтын нядалгааны газарт нядалдаг аж. Тиймээс зориулалтын аргаар чанар, стандартад нийцүүлэн бэлтгэсэн махыг хүнсэндээ хэрэглэж хэвших нь чухал асуудлын нэг юм.
Түүнчлэн махны экспортыг хязгаарласны улмаас ихэнх компаниуд үйлдвэрийнхээ бага хүчин чадлаар ажиллах буюу зарим нь үйл ажиллагаагаа түр зогсоогоод байгаа гэв. Чанар, стандартыг чанд мөрдөх, экспортын компаниуд хамтран ажиллах талаар цаашид анхаарах шаардлагатай байгааг онцлов.