Ерөнхий сайд Л.Оюун-Эрдэнэ ТОП-100 аж ахуйн нэгжийн төлөөлөл, МҮХАҮТ-ын удирдах зөвлөлийн гишүүдтэй уулзлаа
Монгол Улсын Ерөнхий сайд Л.Оюун-Эрдэнэ ТОП-100 аж ахуйн нэгж, зарим мэргэжлийн холбоод, Танхимын дэргэдэх зөвлөлүүдийн төлөөлөл, МҮХАҮТ-ын Удирдах зөвлөлийн гишүүдтэй уулзаж, нээлттэй хэлэлцүүлэг өрнүүллээ. Тус хэлэлцүүлэгт УИХ-ын гишүүн, Үйлдвэржилтийн бодлогын байнгын хорооны дарга Б.Чойжилсүрэн, Сангийн сайд Б.Жавхлан, Боловсрол, шинжлэх ухааны сайд Л.Энх-Амгалан, Хөдөлмөр, нийгмийн хамгааллын сайд А.Ариунзаяа, Зам, тээврийн хөгжлийн сайд Л.Халтар, Барилга, хот байгуулалтын сайд Б.Мөнхбаатар, Нийслэлийн Засаг дарга Д.Сумъяабазар, Үндэсний аюулгүй байдлын зөвлөлийн нарийн бичгийн дарга Ж.Энхбаяр болон холбогдох агентлагуудын дарга нар оролцож, бизнес эрхлэгч, аж ахуйн нэгжүүдээс тавьсан асуулт, санал хүсэлтэд хариулт өгөв.
Уулзалтыг нээж хэлсэн үгэндээ Ерөнхий сайд Л.Оюун-Эрдэнэ Засгийн газраас 2022 оны төсвийн тодотголын төслийг УИХ-д өргөн барих гэж буйтай холбогдуулан хувийн хэвшлийнхэнд мэдээлэл өгөх, саналыг нь сонсох, хэлэлцүүлэг хийх шинэ жишиг тогтоохыг зорьж энэхүү уулзалтыг зохион байгуулж байгаагаа онцолсон юм. Цаашид ч улсын нэгдсэн төсөв УИХ-д өргөн барихаас өмнө Танхимаар дамжуулан хувийн хэвшлийнхэнтэй уулзаж мэдээлэл өгч, хэлэлцүүлж байхаа илэрхийлэв.
Энэ удаагийн уулзалт, хэлэлцүүлгээр төсвийн тодотгол, төсвийн зардлыг хэмнэх, нийслэл Улаанбаатар хотын төвлөрлийг сааруулах зэрэг үндсэн агуулгын хүрээнд Ерөнхий сайд мэдээлэл өгч, бизнес эрхлэгчдийн саналыг сонслоо.
Аж ахуйн нэгж, бизнес эрхлэгчдийн зүгээс хөрөнгө оруулалт, татварын таатай орчинг бүрдүүлэх, орон нутагт бүтээн байгуулалт хийж, ажлын байр нэмэгдүүлбэл татварын тодорхой хөнгөлөлт, чөлөөлөлт үзүүлэх, татвар төлөгчдийн нэр хүндийг өсгөх, экспортлогч аж ахуйн нэгжүүдийг дэмжих замаар экспортыг нэмэгдүүлэх, гадаадаас ажиллах хүч авах боломжийг нэмэгдүүлэх, төрийн албан хаагчдын тоог тодорхой хувиар цөөрүүлэх, төрийн үйлчилгээний зарим чиг үүргийг хувийн хэвшлийн оролцоотойгоор зардал багатай гүйцэтгүүлэх, төлбөр тооцоо, валютын ханштай холбоотой болон чөлөөт бүсийн үйл ажиллагааг идэвхжүүлэх, тээвэр логистиктой асуудлыг шийдвэрлэх зэрэг саналуудын хэлэв.
