"Монгол- Их Британийн бизнес форум" боллоо
Монголын Үндэсний Худалдаа Аж Үйлдвэрийн танхим, Монгол Улс дахь Их Британи, Умард Ирландын Нэгдсэн Хаант Улсын Элчин сайдын яам хамтран “Монгол-Их Британийн бизнес форум”-ыг зохион байгууллаа.
Форумд Их Британи, Умард Ирландын Нэгдсэн Хаант Улсаас Монгол Улсад суух Онц бөгөөд Бүрэн эрхэт Элчин сайд Филипп Малоне, Их Британи, Умард Ирландын Нэгдсэн Хаант Улсын Парламентын гишүүн, Монгол Улсыг хариуцсан Худалдааны элч ноён Даниел Кочинский, Монголын Үндэсний Худалдаа Аж Үйлдвэрийн танхимын Ерөнхийлөгч О.Амартүвшин, Ерөнхий нарийн бичгийн дарга С.Баясгалан болон Гадаад харилцааны яам, Эдийн засаг, хөгжлийн яам, аж ахуйн нэгжүүдийн төлөөлөл оролцлоо.
Монголын Үндэсний Худалдаа Аж Үйлдвэрийн танхимын Ерөнхийлөгч О.Амартүвшин “Манай хоёр улс 1963 онд дипломат харилцаа тогтоосноос хойш 60 шахам жилийн хугацаанд улс төр, худалдаа, эдийн засаг, соёл боловсрол, хүмүүнлэгийн харилцааг хөгжүүлж ирсэн. Цаашид бид худалдааны эргэлтийг нэмэгдүүлэх, худалдааны тэнцлийг ойртуулах, хөрөнгө оруулалтын түншлэлийг бэхжүүлэхэд хоёр талын хичээл, зүтгэл нэн шаардлагатай байгаа” гэв.
Их Британи, Умард Ирландын Нэгдсэн Хаант Улсын Парламентын гишүүн, Монгол Улсыг хариуцсан Худалдааны элч ноён Даниел Кочинский “Монгол Улсад хөрөнгө оруулалт хийх сонирхолтой компаниудад уян хатан нөхцөлтэй зээл олгохоор гурван тэрбум ам.доллар төсөвлөөд байгаа” гэлээ.
Монгол Улсаас 2021 онд Их Британи Улс руу мал амьтны самнасан үс, хялгас, сүлжмэл хувцас, эдлэл гэх мэт нийт 10 сая ам.долларын үнийн дүнтэй бүтээгдэхүүн экспортолсон байна. Харин Их Британи Улсаас Монгол Улс руу 2021 онд сав баглаа, боодол, хүнс, ариун цэврийн хэрэглэл,төмөр замын төхөөрөмж, эд ангиуд гэх мэт олон нэр төрлийн нийт 40 сая ам.долларын үнийн дүнтэй бүтээгдэхүүн импортолжээ.
Хоёр орны худалдааны нийт эргэлт 2021 оны байдлаар 50.1 сая ам.доллараар хэмжигдэж байна. Үүнийг цаашид нэмэгдүүлэх шаардлагатай байгааг оролцогчид форумын үеэр хөндсөн юм. Их Британийн хөрөнгө оруулалттай компанийг үйл ажиллагаагаар нь ангилж авч үзвэл, 36 хувь нь худалдаа, нийтийн хоолны салбарт, 15.5 хувь нь геологи, уул уурхайн эрэл хайгуул, олборлолтын салбарт, 9 хувь нь банк, санхүүгийн салбарт, 28.5 хувь нь бусад салбарт байна.
