МҮХАҮТ-ын Ерөнхийлөгч О.Амартүвшин “Ган хүдэр орд” компанийн үйл ажиллагаатай танилцлаа
МҮХАҮТ-ын Ерөнхийлөгч О.Амартүвшин Дархан-Уул аймагт ажиллав. Энэ үеэр “Ган хүдэр орд” компанийн үйл ажиллагаатай танилцлаа. Тус компани 2013 оноос үйлдвэрлэлээ өргөжүүлж, 2017 оноос шинэ бүтээгдэхүүн болох хорголжин төмөр үйлдвэрлэж эхэлсэн. Засгийн газрын “Шинэ сэргэлтийн бодлого”-ын зургаан чиглэлийн нэг нь Аж үйлдвэрийн сэргэлт. Үүний хүрээнд 13 аж үйлдвэрийн төсөл хэрэгжүүлэхээр төлөвлөж байгааг Уул уурхай, хүнд үйлдвэрийн яам онцолсон. Эдгээр төслүүдийн цөөнгүй хэсэг нь хүнд, хөнгөн аж үйлдвэрийн тулгуур Дархан-Сэлэнгийн бүс нутагт ирэх жилүүдэд шинээр хэрэгжихээр байгаа.
МҮХАҮТ-ын Ерөнхийлөгч О.Амартүвшин "Орон нутагт нэмүү өртөг шингэсэн үйлдвэрлэл байна. Харамсалтай нь АМНАТ, Төмөр замын тээвэр логистикийн хүндрэлээс болж бүтээгдэхүүнээ зорилтот зах зээлд хүргэж чадахгүй, эндээс эдийн засгийн алдагдал хүлээж байна.
Алдааг залруулах, засах боломжийг аж ахуйн нэгжүүдэд олгох хэрэгтэй. Бүх аж ахуйн нэгж, үйлдвэрүүд асуудалтай мэт ойлголт нийгэм рүү шууд өгч болохгүй. Нэг асуудлыг нийтэд нь хамаатуулах зохимжгүй. Ийм хандлагаар хууль, хяналтын байгууллага ажиллах нь бас өөрөө учир дутагдалтай.
Аж үйлдвэрийн шинэ сэргэлтийн талаар өнөөдөр бид ярьж байна. Үйлдвэрлэл явуулж байгаа үйлдвэрээ хэрхэн зөв зохистой, илүү үр ашигтай ажиллах боломжоор хангах уу, тэд мөн өөрсдөөс хамаарах алдаагаа засахад хугацаа өгөх, сайн хөрөнгө оруулалт татах орчныг бүрдүүлэх нь юу юунаас илүү чухал.
Өнөөдөр үүссэн нөхцөл байдлыг нь судлаад, зөв бодлогын дэмжлэг үзүүлэхгүй бол хүндрэлтэй энэ байдал цаашид улам цар хүрээгээ тэлж болзошгүй байна. Уул уурхайн боловсруулах үйлдвэр орон нутагт үйл ажиллагаа явуулна гэдэг олон талын ач холбогдолтой. Нийгэм, эдийн засгийн үр ашиг, эерэг нөлөө нь шууд мэдрэгдэж байдаг. Энэ үйлдвэрт гэхэд 300 гаруй хүн ажиллаж байна.
Ажлын байр, ханган нийлүүлэлт, худалдаа, үйлчилгээ, тээвэр гээд нэмүү өртөг шингэсэн болгон дотоодод үлдэж байна.
Аж үйлдвэрийн сэргэлт, Хот, хөдөөгийн сэргэлтийн бодлогыг үр дүнд хүргэхэд нэмүү өртгийг орон нутагт бий болгож ирсэн үйлдвэрүүдээ бодиттой дэмжих нь нэн тэргүүний асуудал. Дараа нь шинээр бий болгох хөрөнгө оруулалтад анхаарах хэрэгтэй” гэв.
