МҮХАҮТ-ын Дархан Уул аймаг дахь Салбар Танхимын Бүх гишүүдийн V хурал болж, даргаар З.Болорсувд сонгогдлоо
МҮХАҮТ-ын Дархан Уул аймаг дахь Салбар Танхимын Бүх гишүүдийн V хурал Дархан хотод боллоо. Хурлыг нээж МҮХАҮТ-ын Ерөнхийлөгч О.Амартүвшин, Дархан-Уул аймгийн ИТХ-ын дарга бөгөөд Салбарын танхимын Ерөнхийлөгч С.Насанбат, Дархан-Уул аймгийн Засаг дарга Б.Азжаргал нар үг хэлж, мэндчилгээ дэвшүүллээ.
Орон нутгийн зүгээс бизнес эрхлэгчид болон салбарын Танхимын үйл ажиллагааг бүх талаар дэмжин ажиллахаа энэ үеэр илэрхийлж, аймаг, орон нутгийн зүгээс бизнесийн орчныг сайжруулах чиглэлд хэрэгжүүлж байгаа бодлого, үйл ажиллагаагаа танилцууллаа. МҮХАҮТ-ын Ерөнхийлөгч О.Амартүвшин “Бизнест тулгарч буй сорилтууд, тэдгээрийг даван туулах гарц, шийдэл” сэдвээр итгэл хэлэлцүүллээ.
Хуралд МҮХАҮТ-ын дэргэдэх Монголын Олон улсын Арбитрын Ерөнхий нарийн бичгийн дарга М.Шинэбаяр оролцож, “Бизнесийн маргааныг арбитрын журмаар шийдвэрлэх онцлог” сэдвээр мэдээлэл өгсөн бол тус газрын мэргэжилтэн Ө.Бат-Эрдэнэ “Давагдашгүй хүчин зүйл ба хүнд нөхцөл байдал” сэдвээр танилцуулга хийв. “Эйч Ар Клуб”-ын тэргүүн Ш.Баярмагнай “Хөдөлмөрийн тухайн хуулийн шинэчилсэн найруулга”- талаар, “Монгол Такс ТМЗ” компанийн Х.Тунгалагмаа “Татварын багц хуулийн хэрэгжилт”-ийн талаар бизнес эрхлэгчдэд зориулсан сургалт зохион байгууллаа.
МҮХАҮТ-ын Дархан Уул аймаг дахь Салбар Танхимын Бүх гишүүдийн V хуралд нийт 80 гаруй бизнес эрхлэгчид оролцсон бөгөөд Салбарын Танхимын тэргүүлэгч гишүүд болон Салбар Танхимын даргыг шинээр сонголоо.
Салбарын танхимын үйл ажиллагаа, санхүүгийн тайлангийн талаар Салбарын танхимын дарга С.Мэндхүү мэдээлэл өгч, гишүүдийн асуултад хариуллаа. Хурлын дэгийг МҮХАҮТ-ын Гишүүнчлэлийн газрын дарга Ц.Магнайбаатар танилцуулж, Бүх гишүүдийн хурлаар Дархан-Уул аймаг дахь Салбар Танхимын даргаар З.Болорсувд сонгогдлоо.
