МОНГОЛ УЛС БОЛОН ЕВРАЗИЙН ЭДИЙН ЗАСГИЙН ХОЛБОО, ТҮҮНИЙ ГИШҮҮН ОРНУУД ХООРОНД БАЙГУУЛСАН ХУДАЛДААНЫ ТҮР ХЭЛЭЛЦЭЭРИЙН АСУУДЛААР БИЗНЕСИЙНХЭН МЭДЭЭЛЭЛ СОЛИЛЦЛОО

Экспорт, импортлогчдод практик дэмжлэг үзүүлэх зорилготой “Монгол Улс болон Евразийн эдийн засгийн холбоо, түүний гишүүн орнууд хооронд байгуулсан Худалдааны түр хэлэлцээр: ОХУ-ын Холбооны гаалийн албаны зөвлөмж ба асуулт хариулт” сэдэвт уулзалт, семинараар бизнес эрхлэгчдэд хамгийн хэрэгцээтэй гол асуудлуудыг онцлон хэлэлцлээ.

Арга хэмжээний үеэр ЭЗХЯ-ны Худалдаа, эдийн засгийн хамтын ажиллагааны бодлогын газрын дарга Д.Эрдэнэтуяа ЕАЭЗХ-ны бүх гишүүн улс дотоодын соёрхон батлах үйл ажиллагаагаа бүрэн дуусгаж, талууд 2026 оны 5 дугаар сарын 22-ны өдөр Хамтарсан мэдэгдэлд гарын үсэг зурсныг дуулгав. Ингэснээр Худалдааны түр хэлэлцээр 2026 оны 7 дугаар сарын 22-ны өдрөөс эхлэн албан ёсоор хүчин төгөлдөр мөрдөгдөж эхлэх бөгөөд хэрэгжилтийг хангах “Хамтарсан замын зураглал”-ын хүрээнд гаалийн урьдчилсан мэдээлэл болон барааны гарал үүслийн цахим солилцоог үе шаттай нэвтрүүлж, бүрдүүлэлтийг хөнгөвчлөхөөр тохирсоныг онцолсон юм.

Мөн МҮХАҮТ-ын дэд захирал Ч.Баттулга хэлэлцээр хэрэгжсэнээр Монгол Улсаас экспортлох мах, махан бүтээгдэхүүн, ноос, ноолуур, нэхмэл, оёмол бүтээгдэхүүн, арьс шир зэрэг 367 нэр төрлийн бараанд гаалийн тарифын хөнгөлөлт, чөлөөлөлт эдлэх боломж бүрдэж, 180 гаруй сая хэрэглэгчтэй ЕАЭЗХ-ны зах зээлд таатай нөхцөлөөр нэвтрэх стратегийн чухал ач холбогдолтойг тэмдэглэлээ.

Сургалтын үеэр ОХУ болон ЕАЭЗХ-ны зах зээлд бүтээгдэхүүнээ тарифын хөнгөлөлттэй гаргахад хамгийн чухал сэдэв болох барааны гарал үүслийг хэрхэн зөв нотолж, тарифын хөнгөлөлт эдлэх талаар ОХУ-ын Холбооны гаалийн албаны Барааны нэр төрөл, ангиллын газрын дарга Хоршев Дмитрий Юрьевич бизнес эрхлэгчдэд практик зөвлөмжүүдийг өглөө. 

Үүнээс гадна ОХУ-ын Холбооны гаалийн албанаас гаалийн үйл ажиллагааг автоматжуулах, хөнгөвчлөх чиглэлээр авч хэрэгжүүлж буй арга хэмжээ болон ОХУ-ын нутаг дэвсгэрт бараа нэвтрүүлэх журмыг тус албаны Гаалийн хяналтыг зохион байгуулах ерөнхий газрын орлогч дарга Тебенков Алексей Владимирович тайлбарлав. Мөн чөлөөт худалдааны хэлэлцээрийг хэрэгжүүлэхэд Барааны ангилал (БТКУС)-ын ач холбогдол, түүний гүйцэтгэх үүргийн талаар Гаалийн ерөнхий газрын барааны ангиллын хэлтсийн дарга Ч.Чимгэрэл онцлон мэдээлэл хийснээр тус сургалт амжилттай өндөрлөлөө.

Арга хэмжээний илтгэлүүдийг татаж авна уу. 

1. “Монгол Улс болон Евразийн эдийн засгийн холбоо (ЕАЭЗХ), түүний гишүүн орнууд хоорондын худалдааны түр            хэлэлцээр”  Э.Бүжинлхам, ЭЗХЯ-ны Худалдаа эдийн засгийн хамтын ажиллагааны бодлогын газрын Зөвлөх
2. Евразийн эдийн засгийн холбоо (ЕАЭЗХ), түүний гишүүн орнууд болон Монгол Улс хоорондын худалдааны Түр хэлэлцээрийн хүрээнд барааны гарал үүслийг нотлох болон тарифын хөнгөлөлт эдлүүлэх нь Хоршев Дмитрий Юрьевич — ОХУ-ын Холбооны гаалийн албаны Барааны нэр төрөл, ангиллын газрын дарга
3. Оросын Холбооны Улсын нутаг дэвсгэрт бараа нэвтрүүлэх. ОХУ-ын Холбооны гаалийн албанаас гаалийн үйл ажиллагааг автоматжуулах, хөнгөвчлөх чиглэлээр авч хэрэгжүүлж буй арга хэмжээ Тебенков Алексей Владимирович — ОХУ-ын Холбооны гаалийн албаны Гаалийн хяналтыг зохион байгуулах ерөнхий газрын орлогч дарга.
4.  Чөлөөт худалдааны хэлэлцээрийг хэрэгжүүлэхэд Барааны ангилал (БТКУС)-ын ач холбогдол Ч.Чимгэрэл, Гаалийн ерөнхий газрын барааны ангиллын хэлтсийн дарга
5. Монгол Улс болон Евразийн эдийн засгийн холбоо, түүний гишүүн орнууд хооронд байгуулсан худалдааны түр хэлэлцээрийн маргаан шийдвэрлэх механиз Ш.Бүжинлхам, Монголын Олон Улсын Арбитрын нарийн бичгийн дарга