“ХУДАЛДААНЫ БИЧИГ БАРИМТ, ТҮҮНИЙ АЧ ХОЛБОГДОЛ” СЭДЭВТ СУРГАЛТ АМЖИЛТТАЙ ЗОХИОН БАЙГУУЛАГДЛАА
МҮХАҮТ-аас худалдааг хөнгөвчлөх, бизнес эрхлэгчдийг олон улсын худалдааны талаарх мэдээ, мэдээллээр хангах, арга зүйн зөвлөгөө өгөх зорилгоор “Худалдааны бичиг баримт, түүний ач холбогдол” сэдэвт сургалтыг 2025 оны 12 дугаар сарын 03-нд зохион байгууллаа.
Сургалтыг нээж МҮХАҮТ-ын дэд захирал Ч.Баттулга хэлсэн үгэндээ “2024 оны жилийн эцсийн байдлаар Монгол Улсын гадаад худалдааны нийт эргэлт 27.4 тэрбум америк доллар, үүнээс экспорт 15.8 тэрбум ам.доллар, импорт 11.6 тэрбум ам.долларын үнийн дүнтэй байна. Жил ирэх тусам манай улсын олон улстай хийж буй худалдаа өсөн нэмэгдэхийн зэрэгцээ худалдаанд төрөл бүрийн асуудлууд тулгардаг. Эдгээр асуудлууд нь ихэвчлэн хил, гааль, даатгал, гадаад худалдааны гэрээ, бичиг баримт бүрдүүлэлттэй холбоотой байдаг тул энэ сургалтын хүрээнд бизнес эрхлэгчдэдээ мэдээлэл, зөвлөгөө өгч байгаагаараа онцлог” гэв.
Сургалтын үеэр МҮХАҮТ-ын дэргэдэх Монголын олон улсын арбитрын Ерөнхий нарийн бичгийн дарга М.Шинэбаяр: Гадаад худалдааны гэрээ байгуулах арга зүй, Гаалийн ерөнхий газрын Хуулийн хэлтсийн дарга Ч.Тамираа: Гаалийн хилээр нэвтрүүлэх бараа, тээврийн хэрэгсэлд гаалийн хяналт тавих нийтлэг журам, Монголын даатгалын холбооны гүйцэтгэх захирал Ж.Батжаргал: Тээвэр логистикийн салбар дахь эрсдэл ба даатгал, МҮХАҮТ-ын ГХБББГ-ын мэргэжилтэн Р.Ариунтунгалаг: Гарал үүслийн гэрчилгээ, бичиг баримтын шаардлага, ГХБББГ-ын эксперт Н.Мөнхцэнгэл МҮХАҮТ-ын хөндлөнгийн шинжээчийн үйлчилгээ /Экспертиз/ ба Экспертизийн гэрчилгээ”-ний ач холбогдол сэдвээр тус тус илтгэл, мэдээлэл хийлээ.
Тус сургалтад гадаад худалдаа эрхлэгчид, үйлдвэрлэгчид, тээвэр ложистик, даатгалын болон экспорт хийхээр бэлдэж буй 40 гаруй аж ахуйн нэгж, байгууллагуудын төлөөлөл, хувь хүмүүс оролцон мэдээлэл авч санал солилцов.
МҮХАҮТ-ын хөндлөнгийн шинжээчийн үйлчилгээ /Экспертиз/ ба Экспертизийн гэрчилгээ”-ний ач холбогдлыг тодруулбал: Гадаад худалдааны үйл ажиллагааны явцад гардаг төрөл бүрийн маргааны үед талуудын аль алиных нь эрх ашгийг үл хамгаалах зарчмыг баримтлан хөндлөнгийн шалгалт хийж, нотолгоо гаргаж өгөх зорилгоор экспорт, импортын барааны магадлан шалгах хөндлөнгийн шинжээч /ЭКСПЕРТИЗ/-ийн үйлчилгээг 1961 оноос эхлэн үзүүлж байна.
Монголын ба гадаадын аж ахуйн нэгж, байгууллага, хувь хүний захиалгын үндсэн дээр худалдах, худалдан авах гэрээгээр нийлүүлэгдэж буй төрөл бүрийн бараа, тоног төхөөрөмж, түүхий эдийг экспортлох, импортлох явцад элбэг тохиолддог барааны тоо, чанар, иж бүрдэл, марк, тип, артикул зөрөх, нийлүүлэлтийн хугацаа хоцрох зэрэг зөрчлүүдийг илрүүлж нотолгоо /сертификат/ гарган өгдөг.
Тус сертификат нь Монгол Улсын болон олон улсын хэмжээнд хүлээн зөвшөөрөгдсөн эрх зүйн баримт бөгөөд гэмтэлтэй буюу дутуу ирсэн, чанар нь муудсан бараа, тоног төхөөрөмж, түүхий эдийн гаалийн болон бусад төрлийн татварыг буцаан олгох, татвар төлөх хэмжээг үнэн зөв тогтоох, тээвэрлэгч байгууллагатай хохирлоо тооцох, даатгалын байгууллагаар хохирлоо төлүүлэх, шүүхийн захирамж, хариуцагч, нэхэмжлэгчийн хүсэлтээр шүүхэд баримт нотолгоог баталгаажуулах зэрэгт үндэслэх хөндлөнгийн баримт болдог.
Илүү дэлгэрэнгүй мэдээллийг Та бүхэн доорх холбоосоор авна уу. https://www.mongolchamber.mn/p/64
Холбоо барих:
МҮХАҮТ-ын Гадаад худалдааны бичиг баримт баталгаажуулах газар
Хаяг: Монгол Улс, Улаанбаатар хот, Хан-Уул дүүрэг, 1-р хороо, Махатма Гандийн гудамж, МҮХАҮТ-ын байр, 307 тоот өрөө
Утас: 77277070-9
И-мэйл: expertise@mongolchamber.mn
Вэб сайт: www.mongolchamber.mn
