ДЭЛХИЙН БИЗНЕС ЭРХЛЭГЧ ЭМЭГТЭЙЧҮҮДИЙН ЧУУЛГА УУЛЗАЛТАД МҮХАҮТ-ЫН ЕРӨНХИЙ НАРИЙН БИЧГИЙН ДАРГА Б.САРУУЛ ХЭЛСЭН ҮГ
Эрхэм хүндэт Монгол Улсын Ерөнхийлөгч Ухнаагийн Хүрэлсүх,
Энэхүү Дэлхийн Бизнес Эрхлэгч Эмэгтэйчүүдийн чуулганыг санаачлагч Гадаад харилцааны сайд Батмөнхийн Батцэцэг,
Энэ танхимд эмэгтэйчүүдийн эдийн засаг дахь үүрэг ролийг нэмэгдүүлэх талаар,
тэдний, бидний томоохон нөөц бололцоог бүрэн ашиглах, хамтдаа хөгжих асуудлыг хэлэлцэхээр хуран цугласан зочид, эмэгтэй бизнес эрхлэгч, түүчээлэгч та бүхэндээ энэ сайхан өглөөний мэндийг дэвшүүлье!
Welcome to Mongolia!
Монголын Үндэсний Худалдаа, Аж Үйлдвэрийн Танхим нь өөрийн хуультай, уг хуулийн хүрээнд улс орны эдийн засагт хувь нэмэр оруулах, худалдаа экспортыг дэмжих, төр хувийн хэвшлийг холбох томоохон үүрэгтэй институци юм.
Монгол Улс нь 2011 онд Жендэрийн эрх тэгш байдлыг хангах тухай хуулийг баталсан нь Ази, номхон далайн бүсэд бие даасан хуультай болсон анхдагч улсуудын нэг хэмээн тэмдэглэгдсэн байдаг. Харин энэхүү жендэрийн эрх тэгш байдлыг хангах, хөгжлийн хурдасгуур гол хүч нь “хувийн хэвшил” юм.
Ингээд энэхүү чуулга уулзалтаар бүтээлч хэлэлцүүлэг өрнүүлэхэд нэмэр болох үүднээс гурван асуудлыг онцлон тэмдэглэе.
Нэгдүгээрт: Ажил эрхлэлтийн тухай
Монгол улсын Хөдөлмөрийн тухай хууль тогтоомжид аж ахуйн нэгжүүдийн дотоод хэм хэмжээнд жендэрийн асуудлыг тусгайлан дэмжихээр “Жендэрийн мэдрэмжтэй ажлын байрны бодлого”-ыг хэрэгжүүлэхийг Танхимаас тууштай дэмжиж ирсэн.
Тус бодлого нь ажилтан, ажил олгогчид үр нөлөөг нь тэгш хүргэх хүрээнд хөдөлмөрийн орчны ялгаварлан гадууралт, ажил-амьдралын тэнцвэрийг хангахуйц, эмэгтэйчүүдийн хөдөлмөр эрхлэлтийг дэмжих чиглэлээр зайнаас, гэрээс ажиллах боломжийг олгосон, хүүхэд хамгааллын бодлогыг дэмжсэн практик ач холбогдолтой байгааг онцолмоор байна.
Цаашилбал, Ажиллах хүчин дэх эмэгтэйчүүдийн оролцоо нь аливаа улсын нийгмийн болон хөгжлийн чухал зорилт төдийгүй эдийн засгийн өсөлтийн томоохон хүчин зүйл юм. Эмэгтэйчүүдийн ажиллах хүчин дэх оролцоог нэмэгдүүлснээр дэлхийн дотоодын нийт бүтээгдэхүүнийг нэмэгдүүлэх боломжтой болохыг судалгаагаар баталсан байдаг.
Монгол улсын хувьд Эмэгтэйчүүдийн ажиллах хүчний оролцооны түвшин 53 хувь байхад эрэгтэйчүүдийнх 68 хувь байгаа юм. Харин энэ 53 хувь нь Ази тивийн хувьд харьцангуй өндөр үзүүлэлт боловч, бусад хөгжингүй улсуудтай харьцуулахад бид энэ оролцооны хэмжээг нэмэгдүүлэх бүрэн боломж байгаа. Монгол Улс 2050 он гэхэд эмэгтэйчүүдийн ажиллах хүчний оролцооны түвшинг 63 хувь хүртэл өсгөх боломжтой бөгөөд ингэснээр дотоодын нийт бүтээгдэхүүнийг 16 хувиар өснө гэж судалгааны байгууллага тооцоолжээ.
Иймд бид хувийн хэвшлийн хөгжил, үйлдвэрлэл, худалдаа, экпортын аливаа саад тотгорыг арилгах явдлыг бодлогоор тууштай дэмжсэнээр ажлын байрыг нэмэгдүүлэх, эмэгтэйчүүдийн боломж бололцоог бүрэн дайчилснаар улс орон, эдийн засаг хурдацтай хөгжих боломж байна гэж харж байна.
Хоёрдугаарт: Санхүүгийн хүртээмжийг нэмэгдүүлэх
Банк санхүүгийн салбараар дамжуулан жендэрийн эрх тэгш байдлыг хангах бодлогын шинэчлэл эрчимтэй хийгдэж, эмэгтэйчүүд, орон нутгийн хөгжил, ногоон хөгжлийг дэмжсэн санхүүгийн бүтээгдэхүүн, үйлчилгээ хурдацтай бий болж байна.
Эмэгтэйчүүдийн санхүүгийн хүртээмжийг нэмэгдүүлснээр улс орны санхүүгийн систем бэхжидгийг судалгаагаар нотолсон. Эмэгтэйчүүд зээл, хөрөнгө оруулалтын боломжуудыг олж авснаар эдийн засгийн өсөлтөд хувь нэмрээ оруулж, өрхийн санхүүгийн аюулгүй байдлыг сайжруулдаг юм.
Монгол улсын хувьд аливаа хүйсээр ялгасан тоон мэдээлэл улам сайжирч байгаа бөгөөд 2021 онд хадгаламжийн дансны 43 хувь нь эрэгтэй харилцагчийнх бол 57 хувь нь эмэгтэй харилцагчийнх байна. Түүнчлэн Нийт иргэдийн зээлийн дансны 40 хувийг эрэгтэйчүүд, 60 хувийг эмэгтэйчүүд бүрдүүлж байна. Үүнээс харахад манай улсад ч мөн дэлхийн нийтлэг хандлагатай ижил эмэгтэйчүүд хуримтлал үүсгэж, зээлээ хугацаанд нь төлж, урт хугацааны санхүүгийн шийдвэрийг гарган хөрөнгө оруулалт хийх хандлагатай байгаа нь харагдаж байна. Тэдний санхүүгийн зах зээлд оролцох нь эрсдэлийг тархаах, хадгаламжийн нийт бааз суурийг нэмэгдүүлэх, эдийн засгийн үйл ажиллагааг өргөжүүлэхэд ихээхэн нөлөөтэй байдаг.
Иймд эмэгтэйчүүдийн санхүүгийн хүртээмжийг, ногоон санхүүжилтийг дэмжих асуудлыг энэхүү чуулганаас гарах уриалганд мөн тусгах нь зүй ёсны хэрэг юм.
Гуравдугаарт: Цахим эдийн засгийг хөгжүүлэх
Дижитал шилжилтийг түргэсгэх нь санхүүгийн технологи, цахим худалдаа, дижитал ур чадварыг хөгжүүлж, орон нутгийн бизнесийг дэлхийн зах зээлд холбох нь нэн чухал байна. Энэ хүрээнд бид Дэлхийн худалдааны байгууллага, Дэлхийн худалдааны төвтэй ажиллаж байна.
Өнөөдөр энэхүү өндөр индэрээс би та бүхэнд нэгэн сайхан мэдээг дуулгамаар байна. Дэлхийн худалдааны байгууллага, Дэлхийн худалдааны төвөөс манай Үндэсний Худалдаа, Аж Үйлдвэрийн Танхимтай хамтран хэрэгжүүлэх Цахим эдийн засаг дахь эмэгтэй экспортлогчдыг дэмжих WEIDE сангийн төслийн нээлтийг бид хамтдаа хийнэ. Манай Үндэсний Танхим нь олон улсын худалдааг дэмжих 600 гаруй байгууллагатай өрсөлдөн тус Дэлхийн худалдааны байгууллагын сангаас 1 сая долларын буцалтгүй тусламжийн төслийг хэрэгжүүлэх анхны дөрвөн улсын нэгээр тодорсон нь бидний хувьд нэр төрийн хэрэг бөгөөд Монголын эмэгтэй бизнес эрхлэгчдийн дуу хоолойг олон улсын түвшинд хүргэх шинэ боломжийг нээж байна. Монголын Үндэсний Худалдаа Аж Үйлдвэрийн Танхим нь уг төслийг ил тод, хүртээмжтэй, бодит үр дүнтэй хэрэгжүүлэхийн төлөө ажиллах болно.
Эрхэм хүндэт зочид оо,
Дэлхийн бизнес эрхлэгч эмэгтэйчүүдийн манлайлал, ухаан, бүтээлч сэтгэлгээ нь зөвхөн улс орон, бүс нутгийн төдийгүй дэлхийн эдийн засгийн ирээдүйг тодорхойлох хүч болохын ерөөл дэвшүүлье.
Та бүхэнд энэхүү чуулганы ажилд амжилт хүсье.
Let us Inspire, Impact, and Invest together!
