МОНГОЛ–ПОЛЬШИЙН ХАМТАРСАН УЛАМЖЛАЛТ АНАГААХ УХААНЫ АРГА ХЭМЖЭЭ ВАРШАВ ХОТОД АМЖИЛТТАЙ ЗОХИОН БАЙГУУЛАГДЛАА
Монгол Улсын Их Хурал дахь Монгол–Польшийн парламентын бүлгийн төлөөлөгчдийн Бүгд Найрамдах Польш Улсад хийж буй албан ёсны айлчлалын хүрээнд уламжлалт анагаах ухааны салбарын арга хэмжээнүүд Варшав хотноо амжилттай зохион байгуулагдлаа.
Варшав дахь Монгол Улсын Элчин сайдын яамны байранд /2026.04.14/ уламжлалт анагаах ухааны чиглэлээр сургалт, илтгэлийн арга хэмжээ зохион байгуулагдав. Тус арга хэмжээнд ЭМЯ-ны дэргэдэх Уламжлалт анагаах ухааны мэргэжлийн салбар зөвлөлийн ерөнхий мэргэжилтэн, АУ-ны доктор, профессор Д.Цэнд-Аюуш болон Монголын нэгдмэл анагаах ухааны нийгэмлэгийн ерөнхийлөгч, АУ-ны доктор, профессор Г.Машбат нар “Монгол Хануур-2026” үндэсний хөтөлбөр, “Монголын уламжлалт анагаах ухааны судалгаа хөгжүүлэлт: өнөөгийн байдал, ирээдүйн чиг хандлага”, мөн Европын орнуудад түгээмэл тохиолддог өвчнийг хэрхэн уламжлалт анагаах ухааны аргаар эмчлэх талаар танилцуулга илтгэл тавив.
Мөн /2026.04.15/ Варшав хотноо “Монгол, Польшийн уламжлалт анагаах ухааны салбарын зөвлөгөөн” амжилттай зохион байгуулагдав. Арга хэмжээнд хоёр улсын парламентын бүлгийн төлөөлөгчид, төрийн байгууллагууд, эрүүл мэндийн салбарын мэргэжилтнүүд болон бизнесийн төлөөлөл өргөн бүрэлдэхүүнтэй оролцов.
Зөвлөгөөнийг нээж Монгол Улсаас БНПУ-д суугаа Онц бөгөөд Бүрэн эрхт Элчин сайд Н.Оюундарь, УИХ-ын гишүүн, Монгол–Польшийн парламентын бүлгийн дарга Ж.Золжаргал болон Польшийн холбогдох байгууллагуудын төлөөлөл үг хэлэв. Арга хэмжээний хүрээнд уламжлалт анагаах ухааны бодлого, хөгжил, олон улсын хамтын ажиллагааны асуудлуудыг хэлэлцэж, салбарын шагнал гардуулах ёслол, эрдэм шинжилгээ, үйлдвэрлэлийн төлөөллүүдийн илтгэлүүд зохион байгуулагдлаа. Мөн “Монголын уламжлалт анагаах ухаан ба үндэсний эм үйлдвэрлэлийн экспорт, инновац” сэдвийн хүрээнд хувийн хэвшлийн төлөөллүүд оролцож, салбарын хөгжил, олон улсын зах зээлд өрсөлдөх боломжийн талаар санал солилцов. Арга хэмжээний төгсгөлд оролцогчид харилцан туршлага солилцож, цаашдын хамтын ажиллагааг өргөжүүлэх чиглэлээр санал, дүгнэлтүүдийг нэгтгэн хэлэлцэв.
Эдгээр арга хэмжээнүүд нь Монгол, Польшийн эрүүл мэндийн салбар, тэр дундаа уламжлалт анагаах ухааны чиглэлээрх хамтын ажиллагааг бэхжүүлэн хөгжүүлэхэд чухал нөлөө үзүүллээ.
