ӨМНӨГОВЬД ХОСМОГ СУРГАЛТЫГ ОЛОН НИЙТ, АЖИЛ ОЛГОГЧ НАРТ ТАНИЛЦУУЛАХ, ТӨР-ХУВИЙН ХЭВШЛИЙН ТҮНШЛЭЛ МЕХАНИЗМЫГ САЙЖРУУЛАХ ӨДӨРЛӨГ АМЖИЛТТАЙ ЗОХИОН БАЙГУУЛАГДЛАА
Өмнөговь аймагт хосмог сургалтыг олон нийт болон ажил олгогчдод танилцуулах, төр-хувийн хэвшлийн түншлэлийн механизмыг сайжруулах зорилготой “Орон нутагт хосмог сургалтыг хэрэгжүүлэх, төр-хувийн хэвшлийн түншлэлийн тогтолцоог бэхжүүлэх” нээлттэй өдөрлөг, сургалт семинар 2026 оны 4 дүгээр сарын 14–16-ны өдрүүдэд ШУТИС-ийн харьяа Политехникийн коллежийг түшиглэн амжилттай зохион байгуулагдлаа.
Энэхүү үйл ажиллагааны хүрээнд зөв төлөвшил, эерэг хандлагатай, мэргэжлийн өндөр ур чадвартай залуу үеийг аж ахуйн нэгж болон боловсролын байгууллагын нягт хамтын ажиллагаанд тулгуурлан бэлтгэх арга замыг танилцуулж, талууд хамтын ажиллагааны санамж бичгүүдийг байгуулснаар түншлэлийг бодит хэрэгжилтийн түвшинд шилжүүлэв. Түүнчлэн тус Политехникийн коллежийн дэргэд Хүнд машин механизмын мэргэжлийн зөвлөлийг байгуулсан нь салбарын оролцоог институцийн түвшинд бэхжүүлсэн чухал алхам болсон юм. Мөн сонгогдсон мэргэжлүүдийн хүрээнд сургалтын хэрэгцээ, элсэлтийн квотыг тодорхойлж, хөдөлмөрийн зах зээлийн бодит эрэлтэд суурилсан төлөвлөлтийг эхлүүллээ.
Уг арга хэмжээ нь зөвхөн сургалтын шинэ хэлбэрийг нэвтрүүлээд зогсохгүй, төр болон хувийн хэвшлийн хамтын ажиллагааг бодитойгоор бэхжүүлж, хөдөлмөрийн зах зээлийн шаардлагад нийцсэн хүний нөөцийг бэлтгэх, нийлүүлэлтийн тогтолцоог сайжруулах замаар төрийн байгууллагын үйл ажиллагааг илүү оновчтой болгоход чиглэж байна. Өмнөговь аймагт хэрэгжиж буй хосмог сургалтын туршлага нь бүс нутгийн эдийн засгийн өсөлтийг дэмжих, хүний хөгжлийг тэргүүнд тавьсан загвар шийдэл болон хөгжиж байгаа бөгөөд үүнд аж ахуйн нэгжүүдийн оролцоо онцгой ач холбогдолтой юм.
Энэхүү зорилтын хүрээнд “Монголын Алт (МАК)” ХХК, “Энержи Ресурс” ХХК, “Тавантолгой” ХК, “Оюутолгой” ХХК, “Тээврийн нэгдэл” ХХК, “Хасу Даян” ХХК, “МСS Интернейшнл” ХХК, “Сэндвик Монголиа” ХХК, “Хасу Дэвшил” ХХК, “Хурд Автосервис” ХХК болон уул уурхайн салбарын бусад аж ахуйн нэгж, ханган нийлүүлэгч, засвар үйлчилгээний байгууллагууд идэвхтэй оролцож, хамтран ажиллахаа илэрхийлээд байна.
Тус өдөрлөгийг Монголын Үндэсний Худалдаа Аж Үйлдвэрийн Танхим (МҮХАҮТ), Боловсролын яам, Боловсролын ерөнхий газар (БЕГ) болон Германы Олон Улсын Хамтын Ажиллагааны Нийгэмлэг (GIZ)-ийн “Түншлэлд суурилсан техникийн болон мэргэжлийн боловсрол, сургалт-II” төсөл хамтран зохион байгууллаа.
