МОНГОЛЫН БИЗНЕСИЙН САЛБАРЫНХАН ОЮУНЫ ТАЛБАРТ СТРАТЕГИЙН НҮҮДЭЛ ХИЙЖ ЭХЭЛЛЭЭ

МҮХАҮТ-ын их танхимд өнөөдөр Монголын бизнесийн салбарынхны оюуны чадвар, стратегийн сэтгэлгээг сорьсон “Алтан Бэрс-2026” корпорацуудын шатрын аварга шалгаруулах тэмцээний нээлтийнн ёслол боллоо. МҮХАҮТ болон Монголын Шатрын Холбоо хамтран хоёр дахь жилдээ зохион байгуулж буй уг тэмцээнд эдийн засгийн гол тулгуур салбаруудыг төлөөлсөн 30 гаруй топ аж ахуйн нэгж оролцож байна. Нээлтийн үйл ажиллагаанд салбар бүрийн хүндэт зочид, төлөөллүүд хүрэлцэн ирж, бизнесийн стратеги болон оюуны спортын үнэ цэнийг нэгэн цэгт зангидаж буй энэхүү арга хэмжээнд баяр хүргэлээ.

Монголын Шатрын Холбооны Ерөнхийлөгч Г.Занданшатар тэмцээнийг нээж хэлсэн үгэндээ шатрын спортын нийгэмд үзүүлэх нөлөөлөл болон хүмүүжил, соёлын ач холбогдлыг онцгойлон дурдлаа. Тэрээр шатрыг зөвхөн хөлөг дээрх тоглоом биш, хүнийг зөв төлөвшүүлж, сэтгэл санааг засах хүчтэй хэрэглүүр болохыг тэмдэглээд, "Шатрын спорт бол хүний хүмүүжил, сэтгэл зүйг хамгийн зөвөөр төлөвшүүлдэг ухаан юм. Олон улсын жишээг харахад хоригдлуудын дунд шатар хөгжүүлснээр гэмт хэргийн гаралт эрс буурч, хүний хандлага өөрчлөгдсөн туршлага олон бий.

Мөн Казахстан улсад хүүхдийг шатраар хичээллүүлж эхэлснээр сурлага, хүмүүжилд нь асар их эерэг өөрчлөлт гарсан байдаг" хэмээн онцлов Түүнчлэн шатрыг "Их гүрний, их үндэстний тоглоом наадгай" хэмээн тодорхойлж, Монгол үндэстэн агуу оюуны өв соёлтой, дэлхийд өрсөлдөх чадвартай гэдгийг энэхүү тэмцээн баталж буйг тэмдэглэсэн юм. Тэрээр нийтийн болон хүүхдийн шатрыг хөгжүүлэх нь улс орны ирээдүйн хөгжилд үнэлж баршгүй хувь нэмэр оруулахыг сануулаад, бизнесийн лидерүүдэд амжилт хүслээ.

Мөн МҮХАҮТ-ын Ерөнхийлөгч Б.Лхагважав аж ахуйн нэгжүүд өдөр тутам зах зээлийн ширүүн өрсөлдөөн дунд гаргадаг шийдвэр, алсын хараа нь шатрын стратегийн нүүдлүүдтэй ижил төстэй болохыг дурдаж, энэхүү тэмцээн нь байгууллагын соёл, эв нэгдлийг харуулах чухал талбар болохыг онцлов.

Энэ удаагийн тэмцээнд Монголын шилдэг их мастерууд болох Д.Батсүрэн, Б.Гүндаваа, Г.Мөнхгал, Б.Мөнгөнтуул болон олон улсын мастер С.Ган-Эрдэнэ нараар ахлуулсан багууд оюуны талбарт стратегийн нүүдэл хийж эхэллээ.

Хоёр өдрийн турш үргэлжлэх тус тэмцээнд түрүүлсэн баг Монгол Улсаа төлөөлөн Дэлхийн корпорацуудын аварга шалгаруулах тэмцээнд оролцох эрхийг албан ёсоор авах юм. Монгол Улсын 20 дахь аварга С.Мөнхбатын санаачилгаар алтаар бүрж урласан “Алтан Бэрс” шилжин явах цомын төлөөх өрсөлдөөн ийнхүү эхэлж, оюуны спортыг корпорацын түвшинд дэмжих шинэ жишгийг тогтоож байна.