“Дэлхийн лабораторийн өдөр”-т зориулсан итгэмжлэгдсэн лабораториудын аварга шалгаруулах анхдугаар тэмцээн амжилттай боллоо
“Дэлхийн лабораторийн өдөр”-ийг тохиолдуулан салбарын ажилтнуудын хамтын ажиллагааг бэхжүүлэх, эрүүл амьдралын хэвшлийг дэмжих зорилгоор зохион байгуулсан “Итгэмжлэгдсэн лабораториудын аварга шалгаруулах анхдугаар тэмцээн” амжилттай болж өндөрлөв. Энэхүү тэмцээнийг МҮХАҮТ-ын дэргэдэх Итгэмжлэгдсэн лабораториудын зөвлөл санаачлан, "Си Си Ай Си Эн Эйч Кэй" ХХК ерөнхий зохион байгуулагчаар ажиллаж, салбартаа тэргүүлэгч 30 компанийн лабораторийн баг тамирчид сагсан бөмбөг, гар бөмбөг, ширээний теннис, дартс төрлүүдээр хурд хүч, авхаалж самбаагаа сорин өрсөлдлөө.
Тэмцээний нээлтийн үйл ажиллагаанд МҮХАҮТ-ын Гүйцэтгэх захирал Ц.Магнайбаатар оролцож, баяр хүргэн үг хэллээ. Тэрээр хэлсэн үгэндээ лабораторийн салбар нь улс орны хөгжил, бүтээгдэхүүн үйлчилгээний чанар, аюулгүй байдлыг хангахад гол тулгуур болдгийг онцлоод, анх удаа зохион байгуулагдаж буй энэхүү спорт наадам нь мэргэжилтнүүдийн нэгдлийг хангах, салбар хоорондын уялдаа холбоог сайжруулахад чухал ач холбогдолтойг тэмдэглэв.
Тэмцээнд оролцсон байгууллагууд дундаас АПУ ХК, СГС ХХК болон бусад нэр хүндтэй итгэмжлэгдсэн лабораториудын төлөөллүүд идэвхтэй оролцож, цаашид энэ тэмцээнийг уламжлал болгон зохион байгуулахаар болов. Энэхүү арга хэмжээ нь зөвхөн спортын өрсөлдөөн биш, лабораторийн салбарынхан туршлага солилцох, хамтын ажиллагаа тогтоох боломжийг олголоо.
