ХУДАЛДААНЫ БОДЛОГЫН ЗӨВЛӨЛ ИРЭХ ХОЁР ЖИЛИЙН ҮЙЛ АЖИЛЛАГААНЫХАА ТӨЛӨВЛӨГӨӨГ ТОДОРХОЙЛЖ, САЛБАРТ ТУЛГАМДСАН ГОЛ АСУУДЛУУДЫГ ХӨНДЛӨӨ
МҮХАҮТ-ын дэргэдэх худалдааны бодлогын зөвлөлийн дарга Я.Наваан хэлэлцүүлгийн үеэр худалдааны салбарын тогтвортой байдлыг хангахад төр, хувийн хэвшлийн хамтын ажиллагаа, ялангуяа бодлогын нэгдсэн стратеги чухал байгааг тэмдэглэсэн юм. Ирэх 2026-2027 онуудад Танхимын зүгээс худалдааны орчныг сайжруулах чиглэлээр хийх судалгаанууд нь зөвхөн асуудлыг тодорхойлоод зогсохгүй, бизнес эрхлэгчдэд тулгарч буй зардлын дарамтыг бууруулах бодит гарц гаргалгаа болох ёстойг тэрээр онцлов.
Тээвэр логистикийн чиглэлээр хийгдсэн танилцуулга гишүүдийн анхаарлыг хамгийн ихээр татлаа. Дэлхийн зах зээл дэх шатахууны үнийн хэлбэлзэл нь дотоодын авто болон агаарын тээврийн зардлыг 40-50 хувиар өсгөх эрсдэл үүсгээд байгаа нь импортоос хамааралтай манай улсын худалдааны салбарт томоохон сорилт болохоор байна. Ялангуяа далайн тээврийн үнэ ойр ойрхон давтамжтай нэмэгдэж байгаа нь нийлүүлэлтийн сүлжээний тогтвортой байдалд сөргөөр нөлөөлж болзошгүйг Н.Энхнасан дарга анхааруулсан юм.
Мөн хурлаар хөндөгдсөн өөр нэг чухал сэдэв нь банкны картын гүйлгээний шимтгэл байлаа. Одоогийн мөрдөгдөж буй "Төлбөрийн картын журам" нь худалдаа эрхлэгчдийн ашигт ажиллагаанд тодорхой хэмжээний ачаалал үүсгэж байгаа тул энэхүү зохицуулалтыг эргэн харж, олон улсын жишигт нийцүүлэн шинэчлэх нь зүйтэй гэдэгт гишүүд санал нэгдэв.
Зөвлөлийн хурлын төгсгөлд хэлэлцсэн асуудлууд болон гишүүдээс гарсан саналуудыг нэгтгэн МҮХАҮТ-ын удирдлагын түвшинд танилцуулж, улмаар Засгийн газар болон холбогдох яамдад бодлогын зөвлөмж хүргүүлэхээр тогтлоо. Энэхүү үйл ажиллагааны төлөвлөгөө хэрэгжсэнээр Монгол Улсын худалдааны салбарын өрсөлдөх чадвар дээшилж, бизнес эрхлэх таатай орчин бүрдэхэд чухал түлхэц болно гэж Зөвлөлийн гишүүд үзэж байна.
