МОНГОЛ ШАТРЫН ИЖ БҮРДЭЛ ТҮҮХИЙГ АМИЛУУЛЖ БАЙНА
Монголын уламжлал, түүхэн өвийг орчин үеийн бүтээлч бүтээгдэхүүнээр дамжуулан олон нийтэд таниулж буй сонирхолтой жишээг Дэлхийн Оюуны Өмчийн Байгууллага онцлон нийтэлжээ.
ХААН ШАТАР ХХК нь түүхэн сэдэвт шатрын иж бүрдэл үйлдвэрлэж, үндэсний онцлогийг олон улсын зах зээлд амжилттай сурталчилж байна. 2015 онд байгуулагдсан тус компани Монголын түүхийн чухал үеүүдийг бүтээгдэхүүндээ шингээж, соёлын өвийг бүтээлч байдлаар илэрхийлсэн бөгөөд өнөөдрийн байдлаар 30 гаруй улсад бүтээгдэхүүнээ экспортлоод байна.
Тус компани нь Дэлхийн Оюуны Өмчийн Байгууллагаас хэрэгжүүлдэг Жижиг, дунд үйлдвэр эрхлэгчдэд зориулсан Оюуны өмчийн менежментийн хөтөлбөрт хамрагдсанаар өөрийн онцлогт тохирсон оюуны өмчийн стратеги боловсруулж, брэндийн үнэ цэнийг нэмэгдүүлэх, зах зээл дэх өрсөлдөх чадварыг сайжруулах чиглэлээр мэргэжлийн зөвлөгөө, сургалтын дэмжлэг авсан нь компанийн хөгжилд чухал нөлөө үзүүлжээ.
Мөн тус байгууллагаас зохион байгуулдаг зарим сургалт, мэдлэг олгох хөтөлбөрүүд нь үнэ төлбөргүй бөгөөд бизнес эрхлэгчдэд оюуны өмчийн талаарх ойлголтоо гүнзгийрүүлэх, олон улсын зах зээлд нэвтрэхэд шаардлагатай мэдлэг, ур чадварыг эзэмшихэд дэмжлэг үзүүлсээр байна.
Ийнхүү үндэсний өв соёлыг орчин үеийн бүтээгдэхүүн болгон хөгжүүлж, оюуны өмчийг зөв удирдсанаар жижиг, дунд үйлдвэрлэгчид олон улсын зах зээлд амжилттай өрсөлдөх бүрэн боломжтойг энэхүү жишээ тод харуулж байна.
Эх сурвалж: Дэлхийн Оюуны Өмчийн Байгууллага
Нийтлэл бичсэн:
Х. Мэргэншагай, Оюуны өмчийн итгэмжлэгдсэн төлөөлөгч, Тусгай зөвшөөрлийн дугаар №120
МҮХАҮТ-ын Патент, барааны тэмдэг, газар зүйн заалтын газар
Холбогдох утас: 77277070-8
Цахим шуудан: patenttmbur@mongolchamber.mn
