"ЖҮР ҮР" ХХК-ИЙН ҮЙЛДВЭРЛЭЛИЙН ТЕХНОЛОГИТОЙ ТАНИЛЦЛАА

МҮХАҮТ-ын Гүйцэтгэх захирал Ц.Магнайбаатар болон танхимын гишүүн байгууллагуудын төлөөллүүд үндэсний үйлдвэрлэлийн шилдэг туршлага, технологийн шинэчлэлтэй танилцах зорилгоор "Жүр Үр" ХХК-ийн үйлдвэрийн танилцах аялалд оролцлоо. Энэхүү үйл ажиллагааны үеэр "Жүр Үр" ХХК нь хүнсний үйлдвэрлэлийн салбарт олон улсын ISO 22000 стандарт болон бүрэн автоматжуулсан ухаалаг системүүдийг хэрхэн иж бүрнээр нь нэвтрүүлснээ танилцуулж, хүнсний аюулгүй байдал, чанарын хяналтыг технологийн шинэ түвшинд гаргаснаа онцлон харуулсан юм.

Түүхий эдийн боловсруулалтаас эхлээд эцсийн савлагаа хүртэлх бүх процессыг дижитал хэлбэрт шилжүүлж, хүний хүчин зүйлийн эрсдэлийг хамгийн бага түвшинд хүргэж чадсан нь тус компанийг МҮХАҮТ-аас зохион байгуулдаг бизнесийн салбарын хамгийн нэр хүндтэй “ENTREPRENEUR-2025” ёслолын ажиллагаанаас оны шилдэг аж ахуйн нэгжээр шалгарах гол үндэслэл болсныг МҮХАҮТ-ын Гүйцэтгэх захирал Ц.Магнайбаатар энэ үеэр тэмдэглэлээ.

Дэлхийн жишигт нийцсэн ухаалаг шийдэл, орчин үеийн дэвшилтэт тоног төхөөрөмжийг ашиглан бүтээгдэхүүний амт, чанарын тогтвортой байдлыг секунд тутамд баталгаажуулж буй энэхүү сайн туршлага нь бусад гишүүн байгууллагуудын хувьд технологийн шинэчлэл, инновацыг өөрсдийн салбарт нутагшуулах бодит жишээ, харилцан суралцах үр дүнтэй ажил боллоо гэдгийг оролцогчид онцолж байв.