МОНГОЛ-ПОЛЬШИЙН ПАРЛАМЕНТ БОЛОН БИЗНЕСИЙН ТӨЛӨӨЛӨГЧИД ХАМТЫН АЖИЛЛАГААНЫ ТАЛААР САНАЛ СОЛИЛЦОВ
Монгол Улсын Их Хурлын гишүүн, Улсын Их Хурал дахь Монгол-Польшийн парламентын бүлгийн дарга Ж.Золжаргал тэргүүтэй төлөөлөгчид Бүгд Найрамдах Польш Улсад албан ёсны айлчлал хийж, хоёр талын хамтын ажиллагааг өргөжүүлэх асуудлаар цуврал уулзалтууд зохион байгууллаа.
Энэхүү айлчлалын хүрээнд МҮХАҮТ-ын Ерөнхийлөгч Б.Лхагважав Монголын хувийн хэвшлийн дуу хоолойг төлөөлөн оролцож, хоёр улсын худалдаа, эдийн засгийн хамтын ажиллагааг идэвхжүүлэх, бизнесийн таатай орчныг бүрдүүлэх болон хөрөнгө оруулалтыг нэмэгдүүлэх чиглэлээр байр сууриа илэрхийлэв.
Төлөөлөгчид айлчлалын үеэр БНПУ-ын Уур амьсгал, байгаль орчны дэд сайд бөгөөд Ерөнхий геологич Кшиштоф Галостой уулзаж, геологи болон байгаль орчны салбарт хамтарсан төсөл хэрэгжүүлэх, харилцан туршлага солилцох боломжуудын талаар санал солилцсон юм. Мөн БНПУ-ын Сеймийн Эдийн засаг, хөгжлийн байнгын хорооны дарга Рафал Комаревичтэй уулзалт хийж, худалдаа, эдийн засгийн харилцааг өргөжүүлэхэд шаардлагатай хууль эрх зүйн орчинг сайжруулах, эдийн засгийн шинэлэг санаачилгуудыг дэмжих асуудлыг хэлэлцэв.
Түүнчлэн БНПУ-ын Хөдөө аж ахуй, хөдөөгийн хөгжлийн дэд сайд Яцек Черняктай хийсэн уулзалтын үеэр хөдөө аж ахуйн салбарт орчин үеийн техник, технологи, инновацыг нэвтрүүлэх, Польшийн туршлага, нөү-хауг судалж нутагшуулах, малчид болон хувийн хэвшлийг дэмжих бодлогыг боловсронгуй болгох талаар дэлгэрэнгүй ярилцаж, хөрөнгө оруулалт болон хамтарсан төслүүдийг дэмжихээр тохиролцлоо. Эдгээр уулзалтууд нь Монгол, Польшийн эдийн засгийн түншлэлийг гүнзгийрүүлж, салбар хоорондын хамтын ажиллагаанд хувийн хэвшлийн оролцоог нэмэгдүүлэхэд онцгой ач холбогдолтой алхам болов.
