МОНГОЛЫН БИЗНЕС ТӨЛӨӨЛӨГЧИД ГУАНЖОУГИЙН ИННОВАЦТАЙ ТАНИЛЦЛАА
Гуанжоу хотын Пажоу цогцолборт дэлхийн худалдааны гол цөм энд байгаа нь мэдрэгдэж байна. 1957 оноос хойш Хятадын гадаад харилцааны гол гүүр болсон 139 дэх удаагийн “Canton Fair” үзэсгэлэн 2026 оны дөрөвдүгээр сарын 15-ны өдрөөс эхлэн Гуанжоу хотыг инновац, бизнесийн эрч хүчээр дүүргэж байна. Нийт 1.55 сая метр квадрат талбайг хамарсан энэхүү аварга том талбайд дэлхийн өнцөг булан бүрээс ирсэн 210 мянга гаруй худалдан авагчид цугларсан нь олон улсын худалдаа технологийн шинэ эрин үед шилжсэнийг илтгэж байна.
Энэ удаагийн нэгдүгээр үе шат нь “Ухаалаг үйлдвэрлэл” уриан дор зохион байгуулагдаж байгаа бөгөөд үзэсгэлэнгийн танхимуудаар явахад хүн дүрст роботууд зочдыг угтаж, хиймэл оюун ухаанд суурилсан гэр ахуйн төхөөрөмжүүд болон шинэ эрчим хүчний автомашинууд олны анхаарлыг хамгийн ихээр татаж байна. Ялангуяа 32 мянган аж ахуйн нэгж дунд "ногоон" технологи болон нүүрстөрөгчийн ялгарал багатай үйлдвэрлэлийн шийдлүүд давамгайлж байгаа нь энэ жилийн гол онцлог юм. МҮХАҮТ-аас зохион байгуулсан Монголын бизнес төлөөлөгчид энэхүү инновацын урсгал дунд ажиллаж, дотоодын үйлдвэрлэлдээ нэвтрүүлэх боломжтой шинэ шийдлүүдийг судалж, дэлхийн тэргүүлэгч нийлүүлэгчидтэй нүүр тулан уулзаж байна.
Төлөөлөгчид зөвхөн үзэсгэлэнгийн танхимаар хязгаарлагдсангүй, Фошан хотын олон улсын хуурай боомтын асар том агуулахын систем болон хил дамнасан цахим худалдааны төвийн өндөр автоматжуулсан үйл ажиллагаатай танилцлаа. Энэхүү аялал нь зөвхөн бараа бүтээгдэхүүн сонирхохоос илүүтэйгээр, Монгол бизнес эрхлэгчид бүс нутгийн тээвэр логистикийн сүлжээнд хэрхэн үр ашигтай холбогдох, Гуандун мужийн ханган нийлүүлэгчидтэй урт хугацааны түншлэл тогтоох бодит гарцуудыг нээж өгснөөрөө онцлог байв.
Дэлхийн худалдааны "олимп" гэгддэг энэхүү талбараас олж авсан туршлага, шинэ холбоо харилцаа нь Монголын бизнес, аж үйлдвэр, гадаад худалдааны салбарт шинэ эрч хүч, технологийн дэвшил авчирна гэдгийг оролцогчид хэллээ.
