МОНГОЛЫН БИЗНЕС ТӨЛӨӨЛӨГЧИД ГУАНЖОУГИЙН ИННОВАЦТАЙ ТАНИЛЦЛАА
Гуанжоу хотын Пажоу цогцолборт 139 дэх удаагийн “Canton Fair” үзэсгэлэн амжилттай эхэлж 1.55 сая мкв талбайг хамарсан энэхүү аварга талбайд дэлхийн өнцөг булан бүрээс 210 мянга гаруй худалдан авагчид цугларсан байна.
Энэ удаагийн нэгдүгээр үе шат нь “Ухаалаг үйлдвэрлэл” уриан дор зохион байгуулагдаж байгаа бөгөөд үзэсгэлэнгийн танхимуудаар явахад хүн дүрст роботууд зочдыг угтаж, хиймэл оюун ухаанд суурилсан гэр ахуйн төхөөрөмжүүд болон шинэ эрчим хүчний автомашинууд олны анхаарлыг хамгийн ихээр татаж байна. Ялангуяа 32 мянган аж ахуйн нэгж дунд "ногоон" технологи болон нүүрстөрөгчийн ялгарал багатай үйлдвэрлэлийн шийдлүүд давамгайлж байгаа нь энэ жилийн гол онцлог юм. МҮХАҮТ-аас зохион байгуулсан Монголын бизнес төлөөлөгчид энэхүү инновацын дотоодын үйлдвэрлэлдээ нэвтрүүлэх боломжтой шинэ шийдлүүдийг судалж, дэлхийн тэргүүлэгч нийлүүлэгчидтэй уулзан туршлага судалж байна.
Төлөөлөгчид зөвхөн үзэсгэлэнгийн танхимаар хязгаарлагдсангүй, Фошан хотын олон улсын хуурай боомтын асар том агуулахын систем болон хил дамнасан цахим худалдааны төвийн өндөр автоматжуулсан үйл ажиллагаатай танилцлаа. Энэхүү аялал нь зөвхөн бараа бүтээгдэхүүн сонирхохоос илүүтэйгээр, Монгол бизнес эрхлэгчид бүс нутгийн тээвэр логистикийн сүлжээнд хэрхэн үр ашигтай холбогдох, Гуандун мужийн ханган нийлүүлэгчидтэй урт хугацааны түншлэл тогтоох бодит гарцуудыг нээж өгснөөрөө онцлог байв.
