ГАДААД ХУДАЛДААНЫ САЛБАРЫН МЭРГЭЖИЛТНҮҮД ТӨГСӨЛТӨӨ ХИЙЛЭЭ
МҮХАҮТ-ын Бизнес академиас бизнес эрхлэгчдийн өрсөлдөх чадварыг нэмэгдүүлэх, мэргэжлийн боловсон хүчин бэлтгэх зорилгоор 32 дахь жилдээ зохион байгуулж буй “Гадаад худалдааны менежер” мэргэшүүлэх сургалтын ээлжит төгсөлт боллоо. 1994 оноос эхлэн тасралтгүй хэрэгжиж, өнөөдрийг хүртэл нийт 1146 мэргэжилтнийг бэлтгэн гаргасан энэхүү хөтөлбөр нь манай улсын гадаад худалдаа, эдийн засгийн салбарт өөрийн гэсэн үнэ цэнтэй орон зайг бий болгосон юм.
Төгсөлтийн үйл ажиллагаанд МҮХАҮТ-ын Гүйцэтгэх захирал Т.Магнайбаатар оролцон төгсөгчдөд баяр хүргэж, мэргэжлийн дипломыг нь гардууллаа. Тэрээр хэлсэн үгэндээ тус сургалт нь олон улсын худалдааны эрх зүй, логистик, гааль болон санхүүгийн төлбөр тооцоо зэрэг цогц мэдлэгийг онол, практик хослуулан олгодог болохыг онцлов.
Энэ удаагийн сургалтад хүнс, техник технологи, уул уурхай зэрэг эдийн засгийн тэргүүлэх салбаруудын төлөөлөл хамрагдсан нь онцлог байлаа.
МУИС-ийн багш Б.Отгонсайхан гадаад худалдаа нь улс орны эдийн засгийн амин чухал салбар болохыг тэмдэглээд, сургалтын явцад “Монос хүнс” болон “Мобиком” зэрэг томоохон компаниудын үйл ажиллагаатай газар дээр нь танилцаж, онол практикийг амжилттай хослуулсныг онцолсон юм. Дээрх компаниудын ажилтнууд болон салбар бүрийн төлөөллүүд ийнхүү мэргэшсэнээр гадаад зах зээлд өрсөлдөх бодит чадвар сууж байгааг тэрээр дурдлаа.
Салбарынхаа хөгжилд бодит хувь нэмэр оруулах бэлтгэгдсэн боловсон хүчин болж, амжилттай төгсөж буй нийт мэргэжилтнүүддээ ажлын амжилт хүсье.
