ТӨР, ХУВИЙН ХЭВШЛИЙН ТҮНШЛЭЛИЙГ ЭРЧИМЖҮҮЛЭХ ЗАМААР ХӨРӨНГӨ ОРУУЛАЛТЫН БОЛОМЖИЙГ НЭМЭГДҮҮЛНЭ
“Төр, хувийн хэвшлийн түншлэл – Хөрөнгө оруулалтын боломж” сэдэвт долоо хоногийн арга хэмжээний хүрээнд “Төр, хувийн хэвшлийн түншлэлийн форум – 2026” зохион байгуулагдаж байна. Форумд төр, хувийн хэвшлийн түншлэлийн 300 орчим төлөөлөгч оролцож байгаа бөгөөд Эдийн засаг, хөгжлийн яам, Азийн хөгжлийн банк, АНУ-ын Худалдааны яамны Арилжааны эрх зүйг дэмжих хөтөлбөр болон Монголын Үндэсний Худалдаа, Аж Үйлдвэрийн Танхим хамтран зохион байгууллаа.
Форумыг нээж Эдийн засаг, хөгжлийн дэд сайд С.Даваасүрэн үг хэлэхдээ төр, хувийн хэвшлийн түншлэлийн хууль, эрх зүйн орчин, институцын тогтолцооны талаарх ойлголтыг нэмэгдүүлэх, хэрэгжих боломжтой төслүүдийг хөрөнгө оруулагчдад танилцуулахын ач холбогдлыг онцоллоо.
Мөн МҮХАҮТ-ын Ерөнхийлөгч Б.Лхагважав нээлтийн үйл ажиллагаанд оролцож үг хэлэв. Тэрээр хэлсэн үгэндээ МҮХАҮТ-ын зүгээс Төр, хувийн хэвшлийн түншлэлийн (ТХХТ) загварыг Монгол Улсад нэвтрүүлэхэд хуулийн төсөл боловсруулах ажлын хэсэгт ажиллаж, бизнес эрхлэгчдийн саналыг тусгах чиглэлээр идэвхтэй оролцож ирснийг тэмдэглээд, 2025 оноос ТХХТ-ийн төвтэй хамтын ажиллагааны санамж бичиг байгуулан ажиллаж байгааг дурдлаа. Түүнчлэн хувийн хэвшлийн оролцоог бодитоор дэмжих тогтвортой бодлого, ил тод сонгон шалгаруулалт болон эрсдэлийн зөв хуваарилалт нь хөрөнгө оруулалтын санаачилгыг өрнүүлэхэд юу юунаас чухал болохыг тэрээр хэлэв.
Форумын салбар хэлэлцүүлэгт Монголын Олон Улсын Арбитрын Ерөнхий нарийн бичгийн дарга М.Шинэбаяр панелистээр оролцож, түншлэлийн хүрээнд үүсэж болох маргааныг шийдвэрлэх механизм, эрх зүйн баталгааны талаар байр сууриа илэрхийллээ.
Хэлэлцүүлэгт Сангийн яам, Зам тээврийн яам, Эрчим хүчний яамны газрын дарга нар оролцож, салбар тус бүрийн түншлэлийн төслүүд болон институцын тогтолцоог бэхжүүлэх асуудлаар мэдээлэл хуваалцав. Энэхүү форум нь олон улсын санхүүжилтийн механизмыг танилцуулах, туршлага хуваалцах замаар төр, хувийн хэвшлийн харилцан итгэлцлийг бэхжүүлж, эдийн засгийн үр өгөөжтэй томоохон төслүүдийг хөдөлгөхөд анхаарал хандуулж байгаа ажээ.
