Орон нутагт шинээр ажлын байр бий болгох боломжийг судална
МҮХАҮТ-ын дарга Т.Дүүрэн НҮБ-ын Шилжилт хөдөлгөөний байгууллагын Хятад, Монгол дахь салбарын захирал ноён Жьюзеппе Крочети-г өнөөдөр хүлээн авч уулзлаа. Уулзалтад МҮХАҮТ-ын Ерөнхий нарийн бичгийн дарга С.Баясгалан байлцав.
Уулзалтын үеэр МҮХАҮТ-ын дарга Т.Дүүрэн МҮХАҮТ-ын хэрэгжүүлж буй үйл ажиллагаа, бодлого, стратегийн талаар, гадаад улс оронд ажиллаж, амьдарч буй монгол иргэдийн бизнесийг дэмжих, уул уурхайн бус экспортыг нэмэгдүүлэх чиглэлээр хийж хэрэгжүүлж байгаа үйл ажиллагаа, МҮХАҮТ-ын салбар танхимуудын талаар дэлгэрэнгүй танилцууллаа.
Мөн НҮБ-ын Шилжилт хөдөлгөөний байгууллагатай хамтран хэрэгжүүлсэн Булган аймгийн нийгэм, эдийн засаг болон шилжилт хөдөлгөөний системийн динамик загвар гаргах төсөл амжилттай хэрэгжсэн талаар онцолсон юм.
НҮБ-ын Шилжилт хөдөлгөөний байгууллагын салбарын захирал Жьюзеппе Крочети тус байгууллагаас Монгол Улсад хэрэгжүүлэх үйл ажиллагаа сүүлийн жилүүдэд сэргэж байгааг онцлоод, саяхан нээлтээ хийсэн “Хилийн чанад дахь Монголчууд /Монголын Диаспора/-ын мэдлэг чадавхыг Монгол Улсын хөгжлийн хөшүүрэг болгох нь” төслийн талаар танилцууллаа.
Түүнчлэн уулзалтын үеэр тус хоёр байгууллага цаашид хөдөөгөөс хот руу чиглэсэн иргэдийн урсгалыг саармагжуулах, хөдөө орон нутагт ажлын байр шинээр бий болгох зэрэгт хамтран ажиллах боломж байгаа талаар харилцан санал солилцлоо.
