Гадаадын хөрөнгө оруулал татах, аялал жуулчлалыг дэмжих эрх зүйн таатай орчныг бүрдүүлэх талаар хэлэлцэв
МҮХАҮТ, Гадаадын иргэн харьяатын газар (ГИХГ)-тай хамтран тус газраас үзүүлж буй үйлчилгээ, хөрөнгө оруулалт, аялал жуулчлалын эрх зүйн орчин, хөрөнгө оруулагч, жуулчны виз, визийн зөвшөөрөл, оршин суух зөвшөөрөл, цахим визийн www.evisa.mn системийн танилцуулга хийж, хувийн хэвшлийн төлөөлөлтэй санал солилцох, бизнес эрхлэгчдэд тулгарч буй асуудлыг тодорхойлох, цаашид хэрэгжүүлэх арга хэмжээний талаар хамтарсан санал, дүгнэлт гаргах уулзалтыг зохион байгууллаа.
Уулзалт, зөвлөгөөнд Америкийн Нэгдсэн Улсын ЭСЯ, Бүгд Найрамдах Социалист Вьетнам Улсын ЭСЯ, БНХАУ-аас Монгол Улсад хөрөнгө оруулагчдын Зунхуа нийгэмлэг, МҮХАҮТ-ын дэргэдэх Аялал жуулчлалын зөвлөл, уул уурхай, барилга тоног төхөөрөмж, хүнс, хөдөө аж ахуйн салбарын нийт 90 гаруй төлөөлөгч оролцов.
Оролцогчдод Гадаадын иргэний эрх зүйн байдлын тухай хууль (ГИЭЗБТХ)-ийн нэмэлт өөрчлөлт, виз, зөвшөөрөл, оршин суух зөвшөөрөл, зөрчил шалган шийдвэрлэх үйл ажиллагаа, цахим үйлчилгээний талаар танилцуулж, Иргэний харьяалал, олон улсын болон гадаад улсын төрийн бус байгууллагын салбар, төлөөлөгчийн газрын Монгол Улсад үйл ажиллагаа явуулах зөвшөөрөл олгох, сунгах, хүчингүй болгохтой холбоотой мэдээлэл хүргэлээ.
2022 оны байдлаар Монгол Улсад дэлхийн 123 улсын 20 мянга гаруй иргэн албан болон хувийн хэргээр оршин сууж байна. Цахим виз олгох орны тоог нэмэгдүүлж, 99 орны иргэдэд цахимаар виз олгож эхэлсэн, ГИХГ-аас иргэн, аж ахуйн нэгж байгууллагад нийт 33 төрлийн үйлчилгээ үзүүлж буйгаас 15 төрлийн үйлчилгээг үе шаттай цахимжуулсан, цахимаар үйлчилгээ авсан иргэний тоо 2022 оны 1 дүгээр сарын 1-нээс хойш өнөөдрийг хүртэл 74 мянгад хүрсэн зэрэг мэдээллийг өгөв.
Мөн сүүлийн гурван жилд нийтлэг илэрсэн зөрчил дутагдлыг авч үзвэл, гадаадын иргэдийн зүгээс виз, оршин суух зөвшөөрлийн хугацаагаа санаатай болон санамсаргүй хэтрүүлсэн, зөвшөөрөлгүй үйл ажиллагаа явуулах, хууль бусаар хөдөлмөрлөх, шалгалтаар биедээ бичиг баримтгүй, бичиг баримтаа нуух, үрэгдүүлэх зэрэг зөрчлүүд байна. Тиймээс уригч иргэн, аж ахуйн нэгж байгуулагуудын зүгээс хууль тогтоомжийн талаар зохих мэдээллийг нээлттэй авч, гадаадын иргэнийг үнэн зөв мэдээллээр ханган зөрчлөөс сэргийлэх хэрэгтэй талаар санууллаа.
Иргэн, аж ахуйн нэгжүүдийн зүгээс: ГИЭЗБТХ-ийн 24.4-т заасан Гадаадын иргэнийг орон байраар хангасан иргэн, аж ахуйн нэгж, байгууллага түүнийг гадаадын иргэний асуудал эрхэлсэн төрийн захиргааны байгууллагад 48 цагийн дотор бүртгүүлэхтэй холбоотой асуудлаар байр сууриа илэрхийлж, аль болох хөнгөвчлөх, чирэгдэл багатай болгоход анхаарч ажиллахыг хүслээ. Түүнчлэн, цахим виз, визийн зөвшөөрөл, оршин суух эрхтэй холбоотой асуултууддаа хариулт авав.