МҮХАҮТ-ын Ерөнхийлөгч О.Амартүвшин Бүгд Найрамдах Латви Улсаас Монгол Улсад суугаа Онц бөгөөд Бүрэн эрхт сайд Майя Маникаг хүлээн авч уулзлаа
Уулзалтын эхэнд Монгол Улс, Бүгд Найрамдах Латви Улс хоорондын худалдааны эргэлтийг нэмэгдүүлэх, бизнесийн хамтын ажиллагааны салбар, цар хүрээг улам өргөжүүлэн хөгжүүлэхэд нягт хамтран ажиллахаар тохиролцлоо.
МҮХАҮТ-ын Ерөнхийлөгч О.Амартүвшин Бельгийн Хаант Улсын Брюссель хотноо удахгүй нээгдэх МҮХАҮТ-ын салбар Танхим Европын холбооны улс орнуудтай худалдаа, бизнесийн харилцааг хөгжүүлэхэд бодит үр дүн үзүүлнэ гэж харж буйгаа илэрхийлэв.
Бүгд Найрамдах Латви Улс БНХАУ-ын Өвөр Монголын Өөртөө Засах Оронд сүү, сүүн бүтээгдэхүүний хамтарсан үйлдвэрийг амжилттай ажиллуулж буй туршлагыг талууд дурдаж, Монгол Улсын сүү, сүүн бүтээгдэхүүн үйлдвэрлэлийн салбарт хамтран ажиллахад нөөц бололцоо бий гэдгийг онцлов.
Мэдээлэл технологи, ойн үржүүлгийн салбарт Бүгд Найрамдах Латви Улс дэмжлэг үзүүлж, хамтран ажиллахад бэлэн буйг Элчин Сайд Майя Маника тэмдэглэв. БН Латви Улсын их дээд сургуулиудад Монгол оюутнуудыг сургах, тэр дундаа агаарын нисэхийн чиглэлээр сургах нь Хөшигийн хөндийн Чингис хаан нисэх буудал нээгдсэнтэй холбоотойгоор цаг үе олсон хэрэг болохыг дурдав.
2022 онд хоёр улсын худалдааны эргэлт нийт 4 сая ам.долларт хүрснээс манай улсын импорт 48.2 мянган ам.доллар, экспорт 3.520 сая ам.доллар юм.
