О.Амартүвшин: Чанарын дэд бүтцийг хөгжүүлэхэд төр хувийн хэвшлийн хамтын ажиллагааг өрнүүлэх чиглэлээр төрийн холбогдох байгууллагуудтай идэвхтэй хамтран ажиллана
МҮХАҮТ-ын Ерөнхийлөгч О.Амартүвшин “Стандарт ба хөгжил” үндэсний хөтөлбөрийн нэгдсэн хэлэлцүүлгийн нээлтэд оролцож үг хэллээ. Монгол Улсын Засгийн Газраас чанар, стандартын талаар хууль эрх зүйн орчныг сайжруулахад онцгой анхаарал хандуулан, СХЗГ-аас "Стандарт ба хөгжил" үндэсний хөтөлбөрийн төслийг гарган хэлэлцүүлж, санал аван ажиллаж байгаа нь цаг үеэ олсон бөгөөд чанарын дэд бүтцийг сайжруулах, экспортын өрсөлдөх чадварыг сайжруулах, цаашилбал Монгол улсын эдийн засгийн өрсөлдөх чадварыг нэмэгдүүлэхэд үр нөлөө үзүүлэх чухал алхам гэж үзэж байна гэдгийг хэлсэн үгэндээ тодотгоод МҮХАҮТ-ын зүгээс цаашид бизнес эрхлэгчдийн чанар стандартын талаарх мэдлэг чадавхыг дээшлүүлэх, аж ахуйн нэгжүүдийг экспортын зах зээлд гарахад нь дэмжлэг үзүүлэх болон чанарын дэд бүтцийг хөгжүүлэхэд төр хувийн хэвшлийн хамтын ажиллагааг өрнүүлэх чиглэлээр төрийн холбогдох байгууллагуудтай идэвхтэй хамтран ажиллахаа илэрхийллээ.
МҮХАҮТ нь стандарт, чанарын асуудлыг эдийн засгийг төрөлжүүлэх, уул уурхайн бус бүтээгдэхүүний экспортыг нэмэгдүүлэх, аж ахуй нэгжүүдийг дэмжих талаас нь илүү анхаарч ажилладаг. Энэ хүрээнд хууль эрх зүйн орчныг сайжруулах, аж ахуйн нэгжүүдэд олон улсын менежментийн тогтолцоог нэвтрүүлэхэд дэмжлэг үзүүлэх, бүтээгдэхүүн үйлчилгээнд тавигддаг олон улсын чанарын стандартын шаардлагыг таниулах чиглэлээр төрөл бүрийн арга хэмжээ, сургалтуудыг зохион байгуулж ирсэн. Эдгээрийн нэг нь СХЗГ-тай хамтран жил бүр зохион байгуулдаг Үндэсний чанарын өдрийн арга хэмжээ болон Үндэсний чанарын шагналын шалгаруулалт юм.
“Стандарт ба хөгжил” үндэсний хөтөлбөрийн нэгдсэн хэлэлцүүлгийн нээлтийн үеэр Үндэсний чанарын шагналыг гардуулсан бөгөөд
2022 оны Үндэсний чанарын шагналын:
- “Шилдэг аж ахуй нэгж, байгууллага” номинацид - Кашмер холдинг ХХК
- “Шилдэг бүтээгдэхүүн” номинацид - Милко ХХК-ийн “Зөв брэнд”
- “Шилдэг үйлчилгээ” номинацид - Барловорлд Монголиа ХХК-ийн Машин тоног төхөөрөмжийн эд ангиудын шинэ болон ашигласан тос, тосолгооны материал, хөргөлтийн шингэний иж бүрэн шинжилгээ тус тус шалгарав.
